Diadomingo a celebra Dia di Portugal, di Camões y di comunidadnan Portugues. Alan Howell como Presidente di Parlamento interino tabatin e honor di dirigi su mes na tur esnan presente pa celebra e dia aki na Aruba.
El a indica cu ta un dia importante unda comunidadnan rond mundo ta celebra e historia, cultura y identidad Portugues y e celebracion aki ta uno di un caracter internacional unico.
“E mesun caracter internacional unico cu ta tipifica nos Aruba tambe, unda personanan di diferente pais a bin establece nan mes durante e ultimo 150 aña riba nos pida baranca, cada un dunando nan contribucion na engrandece nos pais, tanto economica como culturalmente”, Alan Howell a expresa.
El a sigui bisa cu en general personanan di descendencia Portugues ta conoci pa tin masha bon manera y nan ta traha hopi duro pa hiba nan famia dilanti y pa logra nan meta. “Ainda ta fresco den mi mente tempo cu mi tabata chikito con e meneernan Portugues tabata pasa den bario bende ice cream riba nan bais. Esakinan ta sigur cualidadnan positivo cu nos tur cu ta biba aki na Aruba lo por tuma como ehempel. Central Madeirense sigur pa hopi di nos di San Nicolas tabata un refreskeria inolvidabel, su hamburger sanchwichnan , pan cayente y icecreamnan. Sin lubida e pinda cayentenan cu mi mester a baha cumpra pa mi Mayornan.
El Gallo Rojo na San Nicolas cu te’i keto bay y awe maneha pa mi amiga Cecilia igualmente ta un refreskeria di descendientenan di Portugal, cu tambe por cierto ta forma parti di nos Historia na San Nicolas.
Mi kier a pone enfasis tambe, cu ariba nos pais Aruba, tin hopi ciudadano prominente di descendencia Portugues den funcionan clave manera, Husticia, Educacion, Salubridad, Economia, entre hopi otro.
Cu orguyo mi por menciona cu mi tin hopi amistadnan Portugues”.
Siguientemente e Presidente interino di Parlamento a indica cu Maderia ta conoci pa su horticultura. Imigrantenan di Madeira cu a haci di Aruba nan cas nobo a trece nan amor pa horticultura na Aruba, creando asina un base cu por wordo expande riba dje pa fomenta horticultura y agricultura na Aruba y baha nos dependencia di importacion di fruta y berdura.
Howell a dirigi su mes na esnan di Fundaçao Social Cultural Portuguesa, kendenan a tuma e encargo importante di mantene e cultura y historia Portugues bibo aki na Aruba pa e siguiente generacionnan. El a provecha e celebracion aki pa gradicinan pa nan labor y contribucion pa un mihor Aruba. “Den nomber di Parlamento di Aruba mi ta felicita e comunidad Portugues. Un pueblo orguyoso, un pueblo uni, ta consciente di su cultura y historia”, Alan Howell a finalisa.