ORANJESTAD – Mi no ta cansa di bisa e cos aki, y mi ta bise paso ta e pensamento cu mi ta biba cu ne: Un politico tin cu bisa loke e ta haci y haci loke e ta bisa. Durante campaña e tema di deporte tabata uno central, y for di momento cu mi a asumi responsabilidad manera minister, a cuminsa di biaha cu tur paso necesario pa deporte por haya un bida bek. E ser humano ta central no ta djis palabra bunita, e ta un deber cu nos mester cumpli cu ne.
Deporte ta algo cu nos no por tuma como chansa. Tur deporte sin excepcion ta yuda na un miho calidad di bida, ta yuda na stabilidad mental y hasta financiero. Deporte no tey djis pa pret; Si e no tabata existi, nos lo tabata tin entre otro mas hende cu problema di obesidad y mas hoben cu problema di delincuencia. Awo mas cu nunca mester di stimula esaki den nos comunidad, ya cu na final ta nos como pueblo mes ta paga e consecuencianan.
Lotto pa Deporte
E pensamento cu mi tin rond di Lotto pa Deporte ta keda igual. Si bo ta haciendo algo supuestamente na bienestar di deporte, hacie cu echos! Wak e condicion di e facilidadnan deportivo, wak kico CONCAF ta bisa y puntra bo mes si di berdad nan ta trahando na bienestar di deporte.
Como mandatario responsabel y cu ta kere cu deporte merece miho, mi ta haye absurdo cu no mag cuestiona e maneho cu ta wordo hiba door di Lotto. Pa awo mester cumpli cu loke hues a bisa y no haci mucho pregunta te ora cu e caso mes bin dilanti, ya cu haci pregunta y pidi transparencia aparentemente ta un molester pa Lotto. Riba expresionnan cu mi a haci den direccion di e hues, prome minister Evelyn Wever-Croes a papia cu mi y pidimi pa no haci esaki mas. Prome Minister a comprende e disgusto cu mi ta hiba. Deporte no tabata djis un ‘cabay di campaña’, e ta algo cu ta biba den mi y lo lucha pe te na final.
Sin duda den e dianan aki opositornan politico lo purba score door di bisa cu Prome Minister lo a silenciami. Manera mi a bisa caba, e tema di deporte, igual na tur otro cartera bou di mi ministerio, no ta algo cu mi ta haci chansa cu ne. Bisando esaki, mi kier pa e ta cla cu nada no lo stroba e responsabilidad y compromiso cu mi tin cu deporte, paso netamente esey ta loke ta cay bou pone e ser humano central.