Diabierna 1 di juni Prome Minister Evelyn Wever-Croes a atende RijksMinistetraad na Hulanda. Esaki ta un di e hopi reunionnan importante cu e mandatario a atende na Madre Patria durante su bishita di trabou.
Premier Rutte a guia e reunion. Presente na e reunion tabata Staatssecretaris Raymond Knops y Ministernan Plenipotenciario Guillfred Besaril di Aruba, Anthony Begina di Corsou y Hasani Ellis di Sint Maarten.
Despues cu el a sali di e reunion aki, Prome Minister ta expresa cu el a cuminsa sinti cu Hulanda ta hayando confiansa bek den Aruba. Negociando riba e plan financiero di Aruba, por bisa cu a yega na acuerdo den lineanan grandi tocante e deficit/surplus, tocante con pa baha e debe y tocante supervision financiero. Den e siguiente dianan lo traha riba e detayenan pa yega na un acuerdo final.
“Mi ta hopi satisfecho cu e resultadonan te awor, maske nos no a yega ainda unda nos mester ta, mi tin tur confiansa cu pronto cu poder di Dios nos tin un acuerdo nobo basa riba nos plan financiero pa trece e presupuesto bek den balansa na 2020”, Prome Minister a expresa.