Minister di Turismo, Salubridad Publico y Deporte Sr. Dangui Oduber a trece dilanti den rueda di prensa cu lo bai investiga e funcionamento di e director di Directie Volksgezondheid (DVG) Sr. Jerry Staring. Locual a yega na Ministerio di Salubridad Publico tabata hopi keho y acusacionan serio en contra di e director. Basa riba e conseho di Departamento di Recurso Humano (DRH) a tuma e sigiente pasonan cu lo bai tuma lugar den caso di e director actual.Tin basta dossier di keho cu a drenta contra su persona, kiermen no ta papia di un keho pero varios kehonan. Como mandatario mester tuma e kehonan aki na serio. E conseho di DRH ta bisa cu e Ministerio mester tuma un decision pa haci un comienso nobo na DVG. Sea ta pone un director nobo of ta bin cu un proceso di reorganisacion pero mester haci algo, keda sin haci nada lo ta irresponsabel segun consehonan di DRH na e Minister. E ta hopi importante pa den casonan asina aki sigi e consehonan di DRH. Otro conseho ta pa trece claridad riba e situacion mas pronto cu ta posibel. Pesey mes como gobierno a opta pa bin cu un management team temporario di maximo 12 siman tanten cu e investigacionnan ta andando.E investigacion aki ta pa trece claridad riba tur e kehonan presenta pa wak si esakinan ta cuadra cu e realidad. E management team tey tambe pa evita cu e director lo por intimida e trahadornan pero mas bien pa e trahadornan sinti nan mes liber durante e proceso aki.
E mandatario a duna di conoce tambe cu e caso aki no ta pa motibo cu no por traha cu e director, a traha cu e director pa 8 luna caba. E caso aki ta pa motibo cu e mesun dienst no kier traha cu e director y mester bisa cu no ta cuestion di un grupo chikito pero mas bien un grupo grandi. Prome cu a tuma e decision aki a consulta personalmente cu tur e departamento y tambe sindicato TOPA. Despues di tur esaki a hiba tur e corespondencianan aki pa DRH pa tuma e siguinte paso. No ta cuestion cu no kier traha cu e director segun e mandatario. Loke ta hopi importante ta pa e departamento funciona optimal y si e director no por funciona, como Minister mester tuma un decision. No ta un secreto cu e director aki a wordo nombra politicamente pa ex Minister di Salubridad Publico. E director aki tabata cordinador di ex Minister y a wordo scogi pa e ex Minister sin pasa tur e rekisitonan necesario.
Minister Dangui Oduber a manda un señal bisando cu di awor pa dilanti no ta scoge directornan paso nan ta amigo pero e candidato mester pasa den e proceso di seleccion pa asina scoge e persona mas cualifica pa e posicion cu ta posibel.