Candidato di MEP, Amy Richards: Kico ta integridad y dicon e ta asina importante pa nos empleadonan publico?

Durante diferente reunion den parlamento, e tema di integridad a keda treci dilanti como un parti integral den e maneho di e gobierno actual. Prome Minister Evelyn Wever-Croes a splica cu gobierno ta trahando riba un ‘integriteitsbureau’ y tambe un ‘integriteitskamer’ cu ta cuadra cu e vision pa trece transparencia den nos gobierno y departamentonan gubernamental. Pa compronde miho pakico tin un enfasis riba integridad, ta bon pa para keto un rato riba e significacion di e palabra integridad.
Integridad ta un escogencia personal y un compromiso pa honra moral, etica, balor y principionan. Integridad por fungi como e motivacion di un persona, pa ta consciente di su responsabilidadnan profesional y personal. E ta rekeri disciplina y will power pa ta capas pa resisti tentacion, por ehempel den forma di soborno. E ta importante pa percura pa semper actua den acuerdo cu kico ta moralmente corecto. Integridad mester ta e fundeshi di cada empleado publico, pa asina por ehecuta e maneho di un gobierno den un forma positivo. Un empleado ehemplar ta uno cu ta sigui e ley y actua segun su autoridad.
Honestidad y integridad ta sumamente importante den e bida diario di un empleado publico mirando cu su trabou ta rekeri pa e sirbi e comunidad y e mester ta consciente cu su accionnan por impacta bida di hopi persona. E decisionnan cu ta keda tuma den e diferente departamentonan gubernamental tin efecto directo riba e desaroyo y crecemento di esnan cu ta forma parti di nos dushi comunidad Arubano. Solamente un gobierno cu kier mira e pueblo progresa, manera e gobierno actual di Gabinete Wever-Croes, lo pone e enfasis riba integridad, bon gobernacion y transparencia y haci esaki un parti fundamental di su maneho.