67
Diasabra mainta a tuma luga e di 9 Gold Coast Taekwondo Cup cu participacion di 5 scol di Taekwondo. Grand Master Chaco Cornelio di Noord Taekwondo Center a scoge su 7 bringadonan pa bringa pa e Best Team Cup y Yoshmar Wever a coach tur e bringadonan di Noord Taekwondo Center.
E 7 atletanan cu a bringa pa e copa di Best Team ta: Alisha van Geene, Thomas aan het Rot, Daniel Hernandez, Saratoet Blanco, Pedro Cruz, Dudy Perez y Jaimar Chirinos. E 7 atletanan menciona aki riba a logra score un total di 43 punto di cual Pedro Cruz, Dudy Perez y Jaimar Chirinos a logra sali na prome luga, mientras e otro cuaternan a sali na di dos luga. Dr. Guaicaipuro Jimenez Presidente di Aruba Taekwondo Bond a haci entrega di e copa di Best Team na e coach Yoshmar Wever.
Director di Lotto pa Deporte sr. Di-Stefano Wernet a yama pa despensa su ausencia pa motibo di trabou e no por tabata presente y a manda felicita tur e atletanan cu a participa, specialmente e team ganado cu a sali Best Team na e di 9 Gold Coast Taekwondo Cup.