Den un forma increibel pueblo por tuma nota di e falta di interes di gabinete Wever Croes cu luna pasa ainda durante un ‘bijeenkomst’ cu Prome Minister y despues tambe durante di e reunion publico ora cu a trata e ley di LIM, a mustra di no ta interesa den reapertura di e refineria di San Nicolas..
Parlamentario Mike de Meza a mustra cu despues cu den ambos reunion gobierno bon cla a mustra cu nan no ta mira Aruba cu e refineria mas, siendo cu ta mesun partido di Prome Minister, a tene un accion na porta di refineria cu a carga e nomber di “Ora Zero.”
Durante di e reunionnan aki gobierno a cuestiona formalmente henter e acuerdo cu gabinete Mike Eman II a logra cu CITGO y practicamente a duna indicacion cu nan no ta mira e necesidad di un reapertura di e refineria.
Un industria cu ta representa un 15% di e GDP y cu sigur ta brinda gobierno e posibilidad grandi di no mester tuma medida riba lomba di pueblo manera ta bay haci na luna di Juli proximo, ora cu aumenta BBO y BAZV ta na 6%.
“Ya caba durante di e reunionnan di luna pasa, nos por a tuma nota di un cambio grandi den e posicion di e actual gobierno, caminda e mesun hendenan cu a organisa e manifestacion di ‘Ora Zero’ na porta di refineria pa sostene reapertura di esaki, awor a tuma un posicion di no kier tende mes di e proceso aki y no a haci esfuerso algun pa sinta na mesa cu CITGO.
E falta di pro-actividad aki ta otro contraste na loke tabata e posicion di Prome Minister Evelyne Wever den pasado ora cu durante reunion publico den Parlamento, a mustra cu su persona y su partidi tin varios compania interesa pa tuma e refineria over y habri esaki, hasta indicando cu portanan cu ta habri pa Evelyne, no ta habri pa Mike Eman.
Awe mesun persona aki a mustra un falta di interes total den henter e proceso aki di reapertura y hasta a bay over na ofende oficialnan di e compania CITGO Venezolano bisando cu nan tur ta cera na nan pais pa corupcion.
Gabinete Mike Eman II a hiba un proceso asina grandi y serio pa haya un compania interesa den reapertura di e refineria di San Nicolas, a yega na un acuerdo cu e compania CITGO na Houston y caminda ambos partido a mira e importancia di e proyecto aki den nan propio intees.
Un proyecto cu lo a percura pa un inyeccion economico grandi pa nos pais y lo a percura pa entrada grandi pa gobierno y lo a percura pa hopi cupo di trabou cu tanto hende tabata sperando ariba.
Sinembargo gabinete Wever Croes simplemente no a ni sikiera haci e minimo esfuerso pa bira mas activo ora cu CITGO a anuncia cu e proceso di reapertura lo wordo poni den un ‘slowdown fase,’ debi na cierto desaroyonan mundial den cual gobierno Venezolano a bin haya su mes aden.
Apesar cu gobierno di coalicion no a mira e necesidad pa envolvi su mes den e situacion aki, sikiera pa mira na unda por a duna cooperacion mescos cu gobierno di AVP a haci den pasado, dunando sosten caminda cu tabata por, CITGO siman pasa a anuncia cu e proceso di reapertura, e trabounan concerni lo bay wordo reanuda den su totalidad despues di a logra atende cu algun asunto cu tabata stroba esaki.
Un desaroyo cu gabinete Wever Croes no tabatin participacion mes aden y caminda entre otro por a tuma nota durante di e reunionnan cu a tuma luga luna pasa, a dicidi di aleha minister Glenbert Croes for di e refineria y no a sostene un mocion di fraccion di AVP pa permiti e minister aki sigui atende cu proceso di reapertura di e refineria.
Sigur despues cu e actual Prome Minister mes a organisa un ceremonia di bon bini pa Glenbert Croes ora cu el a yega for di Venezuela despues cu e delegacion di Gabinete Mike Eman II a anuncia di a yega na un acuerdo cu CITGO riba e refineria.
Ta cu sumo placer y gran alivio den pueblo, a tuma nota di e noticia positivo cu CITGO a anuncia algun dia atras, caminda a termina cu e periodo di slowdown y lo bay continua cu e proceso di rehabilitacion cu e trabounan normal,” Parlamentario Mike de Meza a mustra.