Dia mundial di actividad fisico

ORANJESTAD, Aruba – Siman pasa Fundacion Movemento ta Bida hunto cu Departamento di Salud Publico, IBiSA y otro partners a enfoca riba e tema di actividad fisico y salud. Cada dia tabata tin un actividad manera bowling, aqua terapia pa hende mayor, un festival di movemento pa tur edad y a clausura e siman den Caya G.F. Betico Croes riba diabierna anochi locual tabata Dia Mundial di Actividad Fisico. Aki henter anochi publico por a participa den diferente actividadnan manera yoga, weganan popular, fysiofit, tai-chi, pilates, baile di Danza Aruba y Empire dancers, Tang Soo Do, speurtocht, un zumbathon y musica y baile na varios sitio den caya grandi.
Recomendacion pa adulto (18-64 aña) como tambe pa adulto mayor ta pa haci un minimo di 30 minuut di actividad fisico den siman, pa yega na un total di 150 minuut pa siman. Pa beneficio adicional 300 minuut pa siman ta wordo recomenda. Mucha mester haci por lo menos 60 minuut di actividad fisico pa dia. Actividad fisico ta inclui por ehempel canamento, baila, traha den cura, landamento y sport.
Actividad fisico ta importante pa nos salud, bienester y tin beneficio amplio. E ta reduci e riesgo pa malesanan cardiovascular, diabetes y cancer; ta fortifica weso, curason, musculo y pulmon; y ta reduci e riesgo pa un persona cay (vooral importante pa adulto mayor). E impacto di actividad fisico riba e celebro y salud mental tambe ta di menciona. E ta aumenta autoestima y confiansa di un persona, mehora memoria, por preveni y disminui depresion, ta kita stress y anciedad pero tambe mehora beis. Un estudio amplio haci na Australia ta indica cu practica deporte 1-3 biaha pa siman ta reduci stress psicologico cu 34%, si haci 4 biaha of mas pa siman por reduci esaki cu 47%. Banda di actividad fisico, claro cu un alimentacion saludabel y drumi suficiente ta importante pa un salud optimal.
Aunke no tin reemplaso di e beneficio di actividad fisico riba salud, otro aspecto como creatividad y arte por contribui na e bienestar di un persona. Den e sentido aki y tambe pa apoya artesano local, Directie Volksgezondheid a colabora cu Cosecha pa construi borchinan artistico cu un mensahe di salud locual a wordo uza durante e eventonan di siman pasa.
Departamento di Salud Publico ta recomenda pa haci actividad fisico tur dia debi cu e ta yuda un persona biba mas largo y feliz.