Riba papel, e wega aki no tabatin mucho significado pa e oncena di SV Caiquetio di Paradera. Nan tin 5 punto y penultimo riba tabla di ‘division di honor’. Te cu awor nan ta den posicion pa bay play-off di promocion-degradacion na final di e campeonato regular. Un victoria lo no dunana n punto suficiente pa alcansa e di septimo puesto cu ta nifica evita e play-off notorio ey. Riverplate en cambio cu un victoria lo suma 24 punto, dos so for di cuarto puesto riba tabla, den top cuater y classificacion pa play-off.
Riverplate a cuminsa e wega aki cu speransa y motivacion, mas ainda despues di tres victoria consecutivo den e ultimo siman nan. Nan victoria convincente riba SV Dakota den siman 14 tabata un ‘evento’.
Pero bek na realidad locual ta e wega aki cu Riverplate mester a gana riba veld, paso, nan clasificacion pa “final four” ta den wega. Caiquetio a yega stadion cu un plan di wega, un strategia pa gana di Riverplate. Mientras cu e club di Madiki a sali ataka sin wanta atras, Caiquetio a defende den bloki cu hopi pasenshi y disciplina. Den inicio esey tabata parce un strategia suicidio, pero bon ehecuta pa Caiquetio, Riverplate tabata keriendo cu nan por ataka te ora nan haya gana, pero no por a penetra, pa despues Caiquetio contra-ataka nan den un manera relampago cu dos of tres atakante so, ya cu River tabata laga poco hende atras den defensa, y e otronan no tabata baha bek na tempo. Un strategia cu ya a duna fruta pa e oncena di Paradera na minuut 13 caba, un centro precies di Jefferson Lopes pa Darwin Escobar anota e gol di bay ariba pa Caiquetio. Net loke nan tabata kier, sera defensa, hunga contra-golpi, anota trempan, pone e adversario den presion y panico, exacto! Riverplate a reacciona na e manera cu a spera, benta hopi hende den atake atrobe pasobra tin mester di gol y urgente. E gol di empate a bin na minuut 24 pa medio di e goleador Francois Fladimy, hopi a pensa cu eynan Caiquetio su wega a caba, paso, Riverplate ta un ekipo cu sa ataka, aunke nan no sa defende mucho bon, pero na net e wega ey lo hunga den man di Caiquetio. Asina Riverplate a sigui ataka sin para, algun yegada pero atrobe e defensa di Caiquetio a wanta bon, pa colmo e ekipo cu ta score e siguiente gol no ta Riverplate, “shock”, ta Caiquetio riba un counter hopi liher mes den pia di Ericson Croes na minuut 36 pa hasi e wega 2-1 pa e ‘berde y geel’ nan. Di akinan si Riverplate a mane mustra un caida moral, nan a mustra desinfla. Caiquetio tambe a wak esey, nan si a engrandese y tabatin mas iniciativa, en bes di sinta warda y counter, nan a hasta cuminsa arma atake for di atras! Riverplate a mustra bida atrobe si net prome cu halftime pero sin resultado, e anotacion a keda Caiquetio 2 Riverplate 1, toch ainda un surprise, hopi a pensa cu nan sonjo lo caba toch den di dos tempo.
Di dos tempo di wega a cuminsa cu Riverplate den atake, cu intencion, pero Caiquetio tambe a cuminsa un “toma y dame” cu nan, sin miedo! A cuminsa un partidazo akinan. Riverplate tabatin tur chens pa empata; e oportunidad grandi di Fladimy na minuut 51 y e tremendo salbada di e portero di Caiquetio na minuut 57 riba un tiro violento di distancia, Riverplate a manda tur cu tin, Caiquetio atrobe a wanta duro. Pa colmo atrobe Caiquetio den pia di Lionel Stacie cu un gol spectacular di ‘media vuelta’ di volley! Caiquetio ariba 3-1.
Riverplate cu algun cambio a sigui hasi locual nan por bon, ataka. Nan gol di descuento a yega na minuut 71 pa Francois Fladimy atrobe pa hasi e wega 2-3, ainda cu hopi tempo pa busca empate of hasta gana ‘con que sea’. Caiquetio sorpresivamente no a bay full atras atrobe pa preserva e bentaha aki, nan a sorprende atrobe bayendo den atake di biaha, encontrando un Riverplate den “atack-mode” cu buraco atras, un bon vision di wega. Esey a duna fruto di biaha pa Caiquetio na minuut 74 cu un atake di e fullback Jefferson Lopes riba hala drechi pa un bunita centro precies pa Lionel Stacie anota atrobe pa hasi e wega 4-2. Remarkabel ta cu Lopes henter wega a defende impecable y a core hopi pa subi ataka y duna asistencia pa e anotadornan. Riverplate no tabatin solucion pa locual Caiquetio tabata hasiendo, den nan confusion nan a bay flat atrobe, mientras cu Caiquetio a sali busca mas gol cu posesion di bala y un joya di gol na minuut 78 di Cederik Lopez pa hasi e wega 5-2 pa e club di Paradera.
No a keda Riverplate nada mas pa hasi cu sigui ataka, y nan a hasie, depues di hopi chens cla cla pa score finalmente ta Fladimy a hasi e wega 3-5 na minuut 83 pa su ‘hatrick’, pero esey tambe tabata tur cu Riverplate por a hasi den un anochi cu Caiquetio tabata inspira ‘tot en met’. Asina wega a caba, un sorpresa grandi pa tur hende, pero hasta pa Caiquetio mes, nan a realisa cu nan por! Curason nan no tabata falta nunca y cu un organisacion y disciplina asina Caiquetio ta preprando nan mes pa e play-off di “survival” ey. E puntonan no ta conta mas awor pa nan, ta e hamber y deseo pa keda ariba ta importante, asina nan tin hopi chens di keda den ‘division di honor’ sin duda! E ‘man of the match’ Jefferson Lopes a simbolisa e ‘spirit’ di Caiquetio den e wega aki, disciplina y labor. Riverplate, cu chens perdi den nan concepto, pero nan a purba, a keda awo cu 21 punto, 5 tras e di cuater lugar riba tabla cu solamente 3 wega pa hunga, tempo ta cabando pero tin chens ainda, si solamente nan por combina nan wega di atake cu un poco mas defensa y disciplina di planteo di wega.