ORANJESTAD – Na momento cu bo busca, unda nos ta para actualmente, pa nos por drecha y atende cu e problemanan social, mester tin informacion pa bo por traha cu ne. Asina parlamentario Sue-Ann Ras (MEP) a bisa durante su conferencia di prensa diaranson mainta. Ras a referi na e preparacion cu e ta haciendo pa presupuesto, specificamente enfocando riba e.o. tereno di enseñansa y parti social, unda cu e ta buscando pa sa kico mester y unda mester inverti e placa na un miho manera. Pero ora cu no tin suficiente informacion riba e tema, ta bira dificil.
INFORMACION
Ras aki ta papia di un documento cu e Minister di Asuntonan Social, Glenbert Croes a ricibi, cual ta un pida papel unda tur e informacion disponibel tabata ubica. Algo cu sigur no ta suficiente pa haya un bon bista di e situacion real cu tin na Aruba pa loke ta trata e tereno social. Ras ta mustra riba e investigacionnan cu el a bin ta haci riba e maneho y ehecucion di plan(nan) di e gobierno anterior, unda el a haya masha poco informacion. “Un A4 (documento) no ta bisa mi net net nada!”, Ras a bisa. Berdad ta pone riba e pida papel aki, cu tin varios cos ta andando na diferente departamento, manera: Departamento di Asuntonan Social, Bureau Sostenemi, Departamento di Labor, etc. y ta referi na e progreso di algun departamento.
PROGRESO
Pero loke ta poni, esta di e progreso (e documento ta uza e palabra ‘gaande’, esta den desaroyo), no ta un bista realistico. Ora cu a bay check cu cada departamento, a resulta cu tur tabatin un plan cu nan a manda aden, pero no a tende nada bek. “E unico feedback cu algun di nan duna ta, cu e minister di e tempo ey, a haya e peticion pero a pone stop na personal y a dicidi tambe pa pone e plannan bunita den cashi”, Ras a sigui bisa. Como tal Ras ta mustra cu e no por haci nada cu e traspaso cu nan a haya, pasobra no tin nada pa sigui traha riba dje, ni sikiera un dossier pa indica den ki fase e plan ta prome cu a haci e traspaso, pa por garantisa y sigui cu continuacion di gobernacion.
PROBLEMA GRANDI
Loke ta preocupa Ras, ta cu e tereno aki di asuntonan social, hubentud y labor, ta e terenonan unda cu nos tin e problemanan di mas grandi den nos comunidad. Esaki mes ta conduci cu e falta di informacion, ta mas bien un tardanza innecesario, pasobra ta bay tuma mas tempo awor pa resolve e problemanan cu por tin. “Bo tin cu bay investiga, bo tin cu bay analisa cua di tur e plannan bunita cu e minister y gobierno anterior a traha y presenta, realmente a yega na ehecuta”, Ras a sigui bisa.