Durante siman cu a pasa un biaha mas a tuma lugar controlnan general rond di henter nos isla.
Na momento cu a topa aglomeracionnan di hende na cierto lugarnan conoci manera, na Manuelitos, Hotel Bacarat, casnan di FCCA na Noord, Madiki y Seroe Patrishi e team a actua cu man duro.
Na establecimentonan manera Lekker Bar Restaurant, Olde Molen y Cas Casuela, a wordo controla y a percura pa cu despues di cierre di e establecimentonan aki, tur hende bandona e sitionan aki mas liher cu ta posibel.
Aglomeracion na Eagle Beach
Tur grupito cu durante oranan di anochi tabata na Eagle Beach, cu tabata consumiendo bebidanan alcoholico y tabata toca musica duro a wordo atendi ariba esaki y a wordo bisa pa bay for di e sitio. Esnan di cual tabata tin cualke sospecho ribanan a wordo controla. E gruponan aki ta keda riba diadomingo anochi te laat na Eagle beach tocando musica duro, por tolera pa musica wordo toca te 11’or di anochi, pero Si cu volumen abou.
Aglomeracion riba e parkinglot di The Village
Tur e gruponan cu durante oranan di anochi tabata para riba e parkinglot aki, tabata consumiendo bebida alcholico, Flex team a papia cunan y a bisanan pa nan bay for di e sitio aki. Tambe tur esnan cu tabata tin un sospecho ribanan a wordo controla.
Detencion di 5 homber na Nikky Beach relaciona cu droga
Diahuebs, dia 15 di maart, pa mas o menos 10’or y 40 di anochi, durante patruya, Flex Team a topa cu un auto, Kia Rio bruin staciona riba beach. Na momento cu nan a pasa cerca di e auto, nan a haya holor fuerte di marihuana, cu tabata sali for di e auto bruin aki, tambe nan a mira 5 mucha homber sinta den e auto aki. Na e momento ey no tabata tin niun otro auto cerca, pa e motibo aki e agentenan a dicidi di baha y bay haci un control.
E chauffeur y e ocupantenan a wordo pidi pa baha for di e auto. E chauffeur a wordo poni na altura cu e agentenan a haya holor di marihuana cu tabata sali for di e auto aki y cu nan lo bay controla den e auto. Durante cu e agentenan tabata controlando den e auto, nan a bin topa cu un sigaria di marihuana mita huma bou di e asiento di e ocupante. Den e porta banda di chauffeur nan a topa cu un etui preto, den e etui nan a haya 4 saco di zip lock, den e saconan tabata tin un cantidad di yerba parecido na marihuana, den un otro saco conteniendo algo parecido na hasjiesj y un otro saco conteniendo 16 pildo parecido na XTC. E cuater saconan cu nan contenido mesora a keda confisca pa mas investigacion. Tur 5 mucha homber a keda mesora deteni.
Refuerso na Emotions pa accident entre dos brommer.
Diasabra, 17 di maart, pa mas o menos 1’or di marduga, patruya di Oranjestad ta pidi refuerso riba e parkinglot di e club nocturno Emotion’s, pa un accident entre dos brommer.
A resulta cu un di e brommernan su documentonan no tabata valido, tambe e motociclista no tabata tin un rijbewijs valido y tabata bou influencia di alcohol. E contra partido tabata un motociclista di Boneiro kende tabata di bishita na Aruba, e tabata hopi preocupa ken ta bay cubri e dañonan ocasiona na su brommer, pa e motibo aki a start un discussion hopi fuerte, pero mirando e cantidad di patruya di polis cu hopi liher a presenta na e sitio y a sa di calma e situacion. Ambos brommer a wordo hiba cu takelwagen pa warda di Shaba.
Detencion di F. pa motibo di intento di asesinato.
Diasabra dia 17 di maart pa mas o menos 12’or y 52 di marduga, na momento cu Flex Team tabata na altura di Fermin’s Bar riba Caya F.D. Figaroa, via centraal di polis, nan ta tende di un caso di hinkamento na Tanki Leendert, mesora nan a bay na e sitio. Na yegada nan ta topa cu e patruya di Oranjestad, cu tabata atendiendo cu e victima. E doño di e cas a maltrata e homber, e doño di cas a keda deteni.
Detencion den un caso di L.T.U. ( ilegaal)
Diadomingo riba 18 di maart, pa mas o menos 12’or y mey di marduga, durante un control den Koningstraat, na altura di percela 23, e agentenan ta mira casa di un conocido bendedor di droga canando cu un homber desconoci. Na momento cu e agentenan a baha for di auto, e homber desconoci aki a sali na careda bay direcion di un hanchi di tera, despues di un corto persecusion polis ta logra gara e homber, kende ta declara cu e ta ilegaal na Aruba. C.R. naci na Venezuela na 1988, a keda deteni, como cu e ta ilegaal y e tabata tin un sakito cu marihuana den su poder, tambe e tabata bou influencia, ela keda cera y despues pasa pa IASA.
Control na Tipsy Night Club,
Diadomingo, riba 18 di maart, pa mas o menos 1’or y 20, polisnan a tene un control na Tipsy Night Club na Bushiri, tur permiso tabata na ordo y Diamars e doño a keda di laga e copianan na SBV Oranjestad.
Controle na Clubnan Nocturno
Siman pasa tabata un weekend hopi druk, tabata tin hopi motociclistanan for di Boneiro y Corsou en coneccion cu e celebracion di 18 di maart. E clubnan mas bishita tabata hopi druk, Olde Molen tabata hopi druk riba Diadomingo mainta.
Control den becindario di Plaza Betico y Lagoen
Den becindario di Plaza Betico y tambe riba Lagoenweg na altura di cas di Gobernador a wordo patruya preventivamente en coneccion cu e anochi cultural.
Control estilo Spotcheck
Diferente autonan a wordo controla y durante control a haya varios cantidad chikito di marihuana, sakitos di cocaina, tambe algun piedra di cocaina, skernan, cuchiunan, cos pa mula marihuana, tur esakinan a keda confisca.
Resumen di siman: Siman 2018-11, periodo 12 te cu 18 di maart 2018, a tene 129 control. Siman pasa a haci 7 detencion, 5 pa motibo di droga, 1 pa intento di asesinato, y un pa un caso di L.T.U. (ilegaal)