Recientemente Gobierno di Aruba a hay’e cu lomba contra muraya ta tuma un biaha mas pasonan impopular cu e e unico meta di rescata Aruba. Nos no ta papia di sanea nos finanzas mas. Aki ta papia di rescata nos Pais di un posibel derumbe financiero cu tur su consecuencianan.
Pero corectamente manera Evelyn Wever Croes a confirma, e pasonan aki ta necesario. E pasonan aki ta pa rescata nos Pais, proteha e futuro di nos yiunan y salvaguardia nos Status Aparte. Tres factor sumamente importante cu por a bay perdi den un solo instante si Gobierno actual no a actua corecto y responsablemente.
Na mes momento mester bisa cu nos a haya nos mes lomba contra muraya pa motibo cu e Gobierno cu asignatura di MEP POR y RED no a haya e mesun trato cu AVP si a haya. Riba MEP Caft kier a bin pone ultimatum mientras cu e propio Caft aki a permiti AVP desgracia nos pais aumentando nos debe te 93% den solamente 8 aña.
Si bo tene na cuenta cu Pais Aruba a nace 1 januari 1986, pues ta existi como Pais den su status autonomo solamente 32 aña. Si bo considera cu for di 1986 te cu 2009 mediante gobiernonan di diferente asignatura e debe tabata na 49%, pues acumula den 23 aña. Si bo tene na cuenta cu Lago a cera na 1985, e Gobiernonan cu a sigui desde 1986 cu Aruba a drenta su Status Aparte mester e inverti den Aruba pa crea un otro pilar economico. Pa e inversion aki mes di 49% acumula pa diferente Gobierno, MEP na 2001 a tuma rienda y responsablemente a introduci 3% di BBO pa evita cu e debe ta sigui crece. Pa AVP den 8 aña di 2009 pa 2017 mand’e te 93%? Esaki ta un hecho descara pa a desgracia e Pais aki. 93 cen di nos 1 florin ta pa paga debe. Imagina cu bo situacion ta como lo siguiente:
ENTRADA:
Afl. 2000
GASTO/PRESTAMONAN:
Huur/Hipoteca
Afl. 700
Cuminda
Afl. 500
Awa/Coriente/Cable
Afl. 250
Island Finance
Afl. 100
Prestamo pa auto
Afl. 310
TOTAL GASTO/PRESTAMO
Afl. 1860 (93%)
Locual ta resta den bo man ta Afl. 140, esta Afl. 2000 menos Afl. 1860. Bo por biba di dje? NO! Pero esaki no ta tur cos. Bo a sigui presta via otro hendenan cu ta duna prestamo priva na interes halto te cu cierto momento bo no ta alcansa pa paga nada mas. Un luna ta paga esaki pero ta cay atras cu esaya cu finalmente ta crea e abismo cu por conduci na un derumbe total: Bancarota!
Un biaha mas, apesar cu MEP no tin arte ni parte, ta asumi su responsabilidad pasobra pa MEP Aruba tin prioridad.