Diabierna 16 di maart ’18 tabata e ultimo dia pa e federacionnan manda tur formulario corespondiente e nominacion di e atleta cu mas a destaca den aña 2017. Manera a menciona den comunicado di prensa siman pasa, tabata tin basta interes y 14 federacion a oficialmente manda nan nominadonan conforme e rekisitonan. E comision di PED kier a aplaudi e federacionnan cu a presenta nan nominadonan. Esaki sigur ta un muestra di aprecio, honor y sosten cu nan ta duna na nan atletanan y alabes esaki ta un forma di encurasha tur otro atletanan pa sigi hasi nan maximo esfuerso pa destaca y pa wordo nomina den futuro. E federacionnan cu a manda nominado ta lo sigiente: 1.Aruba Teakwondo Association 2.Amateur Baseball Bond 3.Aruba Amateur Weightlifting Association 4.Arubaanse Zwembond 5.Aruba Triathlon Association 6.Federacion Gymnastico Aruba 7.Aruba Table Tennis 8.Aruba Chess Federacion 9.Aruba Sailing Association 10.Aruba Basketball Bond 11.Aruba Atletiek Bond 12. Aruba Lawn Tennis Bond/Beachtennis 13.Organisacion Caballista Arubano 14.Aruba Wieler Bond.
Na mes momento e comision di PED kier a anuncia fecha di extension pa locual ta trata entrega di tur formulario corespondiente pa cu nominacion di nan atleta. Pa esnan cu no a logra manda un nominado, lo por hasi esaki ainda no mas tarda cu diaranson awor 21 di maart 2018, 12:00 PM na oficina di Stichting Sportsubsidie Aruba na Entertainment Center. Den transcurso di siman lo divulga mas informacion den desaroyo di e magno evento Premio Excelencia den Deporte.