Home Local PABIEN ARUBA CU OTRO PROMOCION GRANDI! ‘USA TODAY’ TA MENCIONA ARUBA DEN...

PABIEN ARUBA CU OTRO PROMOCION GRANDI! ‘USA TODAY’ TA MENCIONA ARUBA DEN E TOP 3 ISLANAN NA MUNDO

ORANJESTAD – E siman aki Oficina di Turismo Aruba (A.T.A.) ta ricibi otro noticia grandi y positivo; y ta comparti esaki cu pueblo. E corant USA Today a publica un nota den cual ta nombra Aruba como e di tres isla mas gusta na mundo. E aspectonan principal cu ta haci nos isla merecedor di e posicion, segun e articulo, ta cu nos ta pafo di e ‘hurricane belt’, tin hopi opcion di hotel dilanti di beach y bishitantenan por explora naturalesa den Parke Nacional Arikok.
E articulo ta respalda pa estadisticanan di e pagina islands.com, originalmente compila pa Rebecca Kinnear. Aruba ta aparece despues di Bora Bora y Republica Dominicana, entre e islanan mas busca riba e sitio web. Den su articulo Kinnear ta splica cu “Aruba semper ta un isla popular cu nos publico, y hopi di nan ta biaha p’aya cada aña.”

Ta añadi cu mayoria di nan clientenan ta busca un luga den Caribe caminda nan por yega facil y lihe. “Nan no kier planea hopi; nan djis kier ta riba un beach cu un cocktail den nan man ASAP. Cada isla ta ofrece vuelonan directo for di e ciudadnan grandi, opcion di all-inclusive y e tipo di beachnan Caribense cu bo ta soña cune,” Kinnear a comenta.

Y esey ta exactamente loke Aruba ta ofrece. A.T.A. semper ta busca pa mehora e oferta di vuelo for di e ciudadnan mas grandi den tur mercado, principalmente esun Mericano. Banda di esey, ta promociona constantemente e atractivonan cu nos isla tin bao diferente segmento manera famia, honeymooners, y esnan buscando aventura den naturalesa, entre otro.

A.T.A. ta felicita Aruba cu e logro aki y ta pidi un y tur pa proteha nos recursonan natural, incluyendo nos calor humano, pa asina e sector turistico por sigui prospera y sostene nos pais.