Home Local Alumnonan ta hopi activo cu e UNICEF ‘Kinderrechten Filmfestival’

Alumnonan ta hopi activo cu e UNICEF ‘Kinderrechten Filmfestival’

 

Na 5 scol basico na Aruba, Fundacion Telefon pa Hubentud Aruba ta coordinando e proyecto di UNICEF Hulanda. Durante e proyecto aki primeramente ariba 17 di februari e docentennan di Colegio Santa Famia, Colegio Santa Filomena, Mom Plaisir Basischool, Prinses Amalia y Puis X School a ricibi un training tocante derecho di mucha. Despues di a participa na e training, e docentenan a duna nan alumnonan diferente les tocante derecho di mucha den e siman di 19 di februari. Despues cu e muchanan a ricibi e lesnan, nan mester a traha un pintura tocante e derecho cu pa nan ta mas importante of c unan ta pensa cu mester mas atencion.

E muchanan tawata hopi entusiasma na momento di traha e pintura. E derechonan cu a sobresali durante trahamento di e pinturanan ta derecho pa participa, derecho di enseñansa, proteccion contra droga, prohibicion contra relacion seksual cu mucha, prohibicion contra prostitucion di mucha y pornografia di mucha, educacion, derecho ariba seguridad, proteccion contra abuso di mucha, privacidad, libertad di exprecion y derecho di tin un nomber y nacionalidad y derecho di tin un famia.

Despues cu e alumnonan di cada klas a saca nan top 3, e cabesante di e scol, un ‘filmcoach’ y Fundacion Telefon pa Hubentud a saca un ganador di cada scol. Di e pintura ganador di cada scol, un pelicula lo ser traha. Durante e dos simannan venidero e alumnonan hunto cu e ‘filcoachnan’ di Artmano Multimedia y Cinearuba lo ta trahando e pelicula tocante e derecho expresa den e pintura.

Ariba dia 26 di Maart durante e ‘première’ na Caribbean Cinemas lo saca un pelicula ganador cu lo representa Aruba durante e  Curacao International Filmfestival Rotterdam.

Pa medio di e UNICEF ‘Kinderrechten Filmfestival’ e muchanan ta siña na un manera creativo tocante nan derechonan. Paso na momento cu muchanan conoce nan derechonan, nan por para hunto cu un adulto pa nan derechonan.

E  UNICEF ‘Kinderrechten Filmfestival’ ta ser patronisa pa CEDE Aruba. Fundacion Telefon pa Hubentud Aruba y UNICEF Hulanda kier a gradici tur scol, docente y mucha cu ta participando na e UNICEF ‘Kinderrechten Filmfestival’.

Pa mas informacion tocante e UNICEF ‘Kinderrechten Filmfestival’ na Aruba por tuma contacto cu Fundacion Telefon pa Hubentud Aruba na 5886138.