77
Colony – Diadomingo pa mas o menos 5’or y 20 di marduga, durante un control den Seroe Colorado, e patruya di San Nicolas ta bin topa, na altura di Centro Colorado cu dos homber tur na sanger.
Na prome instante a pensa cu por ta trata di dos persona ilegal, pasobra nan tabata papaia basta bruha y a confundi e agentenan.
Segunnan version, nan a bay bishita un bar na San Nicolas y a bebe te bira burachi.
Ora a yega momento di bay bek nan destinacion, nan lo a haya lift cu un supuesto taxi, e “taxista” a bisa di lo hibanan unda nan ta hospedando.
E supuesto taxi sabiendo cu e dos hombernan aki no ta local y nan tabata burachi enbes di a hibanan unda nan ta hospeda na Oranjestad, a tuma rumbo di Colony. Segun e dos victimanan, den e auto lo tabata tin mas persona.
Den Seroe Colorado, na un caminda desconoci pa nan, chauffeur a para e auto y eynan ta caminda cu ambos homber a wordo seriamente maltrata cu un obheto, aparentemente un arma, mayoria di e golpinan fuerte tabata na nan cabes, lagando ambos tur na sanger atras.
E victimanan di nacionalidad Mexicano y ta traha riba un barco ci ta mara actualmente den waf na Playa.
Un di nan a wordo trata na Imsan, pero e otro a haya mas golpinan fuerte y mester a wordo transporta pa Hospital pa un tratamento medico mas avansa.
E caso aki a resulta di ta un atraco cu violencia, caminda cu e dos personanan aki, por te hasta a perde nan bida.