Manera ta conoci Gabinete Wever-Croes a decreta aña 2018 como aña di Papiamento. No solamente dia 22 di mei 2018 nos ta celebra cu 15 aña pasa Aruba su Gobierno a oficialisa Papiamento como idioma oficial di Aruba banda di Hulandes, pero tambe kier usa e aña aki pa logra cosnan positivo y di influencia ariba e desaroyo di nos lenga materno.
P’ami Papiamento ta di fiesta! Pero mi kier a haci un apelacion na cada un di boso pa enberdad aporta pa haci e fiesta aki uno grandi.
Nos tur mester duna contenido real na e celebracion aki. Cu echonan Gobierno a indica cu ‘barco para den waf no ta gana fleta!’. E decreto a keda oficialisa y presenta y ya caba e prome proyecto a keda anuncia. Gobierno a presenta e proyecto caminda conhuntamente cu SETAR lo introduci dentro di poco e ‘spell check’ na Papiamento. Sigur un tremendo iniciativa. E ‘spell check’ lo aporta pa yuda y stimula nos di skirbi nos dushi idioma Papiamento corectamente.
Alabes a anuncia cu e aña aki un biaha mas Departamento di Cultura Aruba (DCA) lo presenta su calendario cultural caminda cu conhuntamente cu Fundacion Lanta Papiamento (FLP) lo bay duna atencion special na e celebracion bunita aki. Pa basta tempo DCA y FLP ta traha a base di un relacion basta estrecho y mi ta contento di tende cu pa e aña aki esaki lo continua.
Mi deseo ta cu pueblo enberdad ta bay brasa e celebracionnan aki y cu di berdad ta bay participa na e diferente actividad, charla y competencianan cu lo keda organisa. Pero mas cu tur cos mi ta spera di curason cu cada un di nos realisa cu Papiamento ta nos mester cuid’e, proteg’e y mas cu tur cos nos mester ta orguyoso di dje. Mayornan tin e tarea principal pa garantisa cu Papiamento den tur sentido di palabra keda traspasa pa nos siguiente generacionnan.
Maestronan di scol tambe tin un tarea primordial den e traspaso aki y nan por haci’e diariamente y sigur e aña aki por dun’e atencion adicional. Un manera cu mi ta kere cu lo ta hopi bunita ta, si tur scol secundario aki na Aruba participa na Arte di Palabra. Un competencia literario caminda hobennan usando nos dushi Papiamento por participa na diferente categoria di competencia manera poesia, storia cortico y haiku. Arte di Palabra ta un competencia cu ta keda organisa na Aruba, Curaçao y Boneiro y e ganadornan di cada pais ta bay competi den Arte di Palabra ABC. Mi a experiencia un Arte di Palabra ABC na Curaçao y eynan hasta brassband cada scol ta bin cu ne pa apoya nan representantenan. Brassband cu ta consisti di muchanan di scol mes. Sigur ta di aplaudi e sistema aki pasobra banda di amplia e bahul di obranan literario presenta pa hobennan, ta mantene e ritmo di asambeho bibo bou di e generacion jong. E aña aki e competencia lo ta dia 3 di maart. Pa mas informacion di e competencia Arte di Palabra por tuma contacto cu Departamento di Cultura Aruba na 5822185 of via nan pagina di Facebook.
Alabes mi kier a enfatisa cu comercio y prensa ta esnan cu sigur e aña aki por duna atencion special na nos dushi Papiamento. Hopi biaha nos mester constata cu propaganda, foyeto di informacion etc. aki na Aruba ta na ingles. Un apelacion na comercio pa e aña aki haci tur nan promocion y campaña di informacion na Papiamento. Mi no por laga prensa afor, pasobra diariamente nan t’esnan cu mas ta influencia y tin un impacto riba e bon uso di Papiamento di nos pueblo. Con? Door di duna e bon ehempel.
Por ultimo ami como parlamentario tambe por aporta y a dicidi di haci esey door di yuda duna atencion y participa na e celebracion special di e aña aki y tambe comparti informacion cu mi tin encuanto actividad, proyecto, competencia etc. Alabes mi a propone pa yuda cu leynan pendiente na Parlamento cu ta trata nos dushi Papiamento, esta cu esaki(nan) por keda trata. Mas cu claro mi lo ta mas cu dispuesto pa yuda crea leynan necesario pa garantisa cu nos lenga materno ta keda usa, protehi y traspasa.
Ya caba mi a haci mi prome sondeo cu yudansa di e archivaris aki na Parlamento y a haya diferente informacion. Den e informacionnan aki mi a topa cu e ley Landsverordening schrijfwijze Papiamento cu ta den un fase avansa y mi lo haci tur mi esfuerso pa percura pa e ley aki sigui cana su caminda te cu e por keda trata den parlamento.
Palabra di gradicimento na Gobierno pa cu e decreto aki. Palabra di exito na DCA, FLP y tur otro instancia/departamento cu lo bay aporta na e celebracion aki. Na Aruba completo: ban celebra nos dushi Papiamento! Union ta haci forsa! Hunto nos por haci e aña aki uno exitoso.