ORANJESTAD, Aruba – Ariba diasabra 16 di December, YMCA Aruba a tene su celebracion anual di Pasco. Miembronan, mayornan, y conocirnan a disfruta di diferente presentacion cu a ser duna dor di e muchanan y hobennan cu ta miembro di YMCA Dakota y YMCA San Nicolas.
Anualmente YMCA Aruba ta organisa su celebracion di Pasco, unda ta trece miembronan, mayornan y conocirnan di ambos centro hunto pa asina disfruta di diferente sorto di presentacion cu ta ser duna dor di YMCA su miembronan. Sherwin Wester, Youth Worker na YMCA Dakota a splica cu a parti e shownan den grupo di YMCA Dakota y YMCA San Nicolas. Cada un Youth Worker a haña un grupo pa train, y e sorto di show, baile, canto, of por ehempel teatro a wordo scogi abase di e talentonan y deseonan di e muchanan.
Donna-Lee Eddie, supervisor di Kids & Youth programs, a keda responsabel pa cu e programa di e anochi, y a organisa esaki te den detaye pa asina tur cos bay bon ariba e anochi special akinan. Tras di e anochi special akinan tin lunanan di preparacion. Unda e youth workers, staff y miembronan ta train pa nan show, y ta prepara e material di decoracion y trahenan.
Youth workers y supervisornan di YMCA Aruba ta train y motiva e muchanan pa cu e anochi special akinan. Tambe nan ta siña e muchanan tacticanan di improvisacion pa ora un show no bay manera nan a prepara. Durante e show tabata tin momento cu mester a improvisa. Esaki ta duna espacio pa e muchanan por mustra e publico nan creatividad. “Nos ta hopi contento con e evento a bay”, asina Sherwin Wester a expresa.
Donna-Lee Eddie a gradici mayornan cu a coopera cu YMCA door yuda cu e materialnan pa e trahenan di e muchanan. Tambe el a gradici e personanan cu a yuda organisa e evento di Experience San Nicolas kende a entrega kerstboomnan como donacion. “E kerstboomnan a yuda nos hopi pa decoracion. Mi ta hopi gradicido”, asina e supervisor a termina.