Home Local Riu Palace Antillas a gradici nan pa nan bon trabou na St....

Riu Palace Antillas a gradici nan pa nan bon trabou na St. Maarten Boluntarionan di Rode Kruis Aruba a ricibi un Thank You Lunch

SHARE

ORANJESTAD, Aruba – Diadomingo dia 17 di December 2017 pa 12:30pm Riu Palace Antillas a tene un Thank You Lunch na Riu Palace Antillas den Rimini Restaurant pa 70 boluntario di Rode Kruis Aruba, kendenan a bay St. Maarten pa asina yuda nan despues cu horcan Irma a pasa eynan. Riu Palace Antillas a pensa di haci un lunch p’e boluntarionan pa motibo pa loke cu nan a haci y pa con duro nan a traha na St. Maarten y esaki ta un manera pa nan por gradici e team pa nan trabou y dedicacion.

Director di Rode Kruis Aruba, Michel La Haye, a hiba palabra e atardi aki y a gradici Riu Palace Antillas p’e cena di gradicimento. El a sigui indica cu hopi biaha ta lubida riba nan y tambe riba e trabounan cu nan ta haci pa comunidad. Dany Nieto tambe a hiba palabra den nomber di gerencia di Riu Palace Antillas, unda cu el a gradici nan p’e dedicacion cu nan tin pa yuda comunidad di Aruba, pero tambe comunidad di St. Maarten.

Riu Palace Antillas a entrega un plakkaat na Director di Rode Kruis, tambe a gradici Indra Anthony- Pereira Operations & Marketing Manager di Rode Kruis Aruba y Ruben Ibarra Boluntario di Rode Kruis Aruba pa por a yuda organisa e evento aki.

Durante e lunch Riu Palace Antillas tabatin un buffet Super bon surti y cosnan di bebe na nan gusto. E boluntarionan a gaba cu e cuminda tabata super delicioso, specialmente e sopi di Seafood tabata hopi campeon. E dessertnan tabata super dushi, unda cu tabatin un variacion grandi cu nan por a scoge di dje. Tur hende a pasa un momento agradabel y tabata contento cu e reconocemento pa nan trabou.

Famia Riu a funda Riu Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion “all inclusive”. Riu Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.

Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.