Un iniciativa di Asuntonan Social cu cooperacion di Departamento Progreso Laboral, e anochi aki a conta cu presencia di Minister Glenbert Croes, acompaña pa Darlaine Erasmus y Parlamentarionan Hendrik Tevreden y Sue Ann Ras. Un anochi informativo y di cooperacion mutuo unda a mustra e hobennan cada paso di e trayectoria con pa drenta e mercado laboral, di scol pa stage te cu haya trabou. A emfatisa e importancia pa e hobennan aki encontra e pasion pa eherce locual cu nan gusta.
A splica nan tambe dje importancia pa nan mes traha riba nan abilidadnan personal desaroyando nan mes riba diferente aspecto como tambe dje importancia di por tin un trabou. Ora nan ta traha no solamente nan ta hiba nan mes dilanti pero nan ta contribui grandemente n’e desaroyo di nos Pais. Di otro banda a scucha tur pregunta, remarca y preocupacionnan di nos hobennan cu tabata presente. Nan a splica di e dificultadnan actual cu nan ta encontra pa drenta e mercado laboral.
Minister Glenbert Croes a gradici e participacion, input y feedback di nos hobennan presente. Na su turno Minister a splica e hobennan cu nan por conta cu ne, cu e t’ey pa yuda nan y asisti nan. Cu su meta ta pa reduci significantemente e 25% di desempleo cu n’e momentonan aki tin bou di nos hobennan.