Den e transcurso di siman pasa y comienso di fin di siman nos pueblo a wordo sacudi cu e noticia di e fayecimento di Rishandroh Anastacia y e circumstancianan bou di cual Rishandroh a perde su bida. Fraccion di coalicion ta biba e sucedido lamentable aki profundamente huntu cu famia di Rishandroh y cu pueblo completo. Nos ta sigur cu palabra ta keda falta pa por expresa e dolor inmenso cu nos tur ta bibando huntu cu e famia den e momentonan dificil aki.
Pero asina mes cu kisas palabra lo keda falta nos ta extende nos mas profundo pesame y tambe ta desea e famia di Rishandroh hopi forsa den e momentonan aki. Nos ta biba e dolor cu boso.
E sucedido aki ta uno serio y nos no lo bira nos cara na e realidad cu abuso di mucha ta algo cu ta biba den nos comunidad. E aspectonan social di nos pueblo a wordo neglisha y laga un banda. E miembronan di coalicion den Parlamento di Aruba ta reconose e responsabilidad y tarea grandi cu tin nos dilanti pa atende cu urgencia e problematica grandi aki cu nos pueblo ta bibando ariba tereno social, primordialmente e aspectonan social cu ta salvaguardia e derechonan y bienestar di nos muchanan. Ta di lamenta profundamente cu e problematica aki a wordo permiti pa jega asina lew.
Nos compromiso pa cu esaki ta pa duna atencion debido y soluciona esaki trahando di serca y den cooperacion cu tur e instancianan concerni. Pa medio di e vaste comissie ariba tereno social y hudicial tin comunicacion estrecho cu instancianan manera Sociale Zaken, Voogdijraad, Bureau Sostenemi, Kinder- en Zeden Politie y tambe hulplijnen manera Telefon pa Hubentud y Tienda di Educacion pa asina haña un idea y bista ariba con nan relacion nan y cooperacion ta entre otro y pa yuda facilita y optimalisa esaki. Tambe pa nos por haña un bista ariba ki plan concreto tin den luga pa combati e tipo di desaroyonan aki. Nos ta na altura cu den e ultimo añanan hopi a wordo corta den e presupuesto y subsidionan di e instancianan aki y cu esaki sigur a hasi nan trabou mucho mas dificil y practicamente imposibel mirando cu consecuencia di no tin presupuesto y subsidio adecuado ta cu no tin e personal suficiente pa efectivamente ehecuta plan nan necesario, atende, preveni y combati e desaroyonan social negativo aki.
Mas aun nos lo percura pa beleid necesario, cu nunca a wordo crea, pa esakinan wordo no solamente crea pero tambe poni den luga cu ehecucion debido di e leynan aki pa asina tin claridad pa tur instancia sa unda y ki ora den e proceso di atende cu casonan di abuso di mucha nan tin cu actua y sigi cu e proceso. Nos ta kere cu sigur e ta importante pa traha den liña estrecho cu instancianan aki ta necesario, paso ta esaki ta e wowo y orea den e pueblo y sa kiko ta come y bebe ariba tereno social di nos pais.
Mas a lew nos no lo drumi ariba e tratamento di e ley pa instala un Kinderombudsman cu tin mas cu un aña cla pa a wordo trata den Parlamento y cu por cierto ta toca directamente e derecho di nos muchanan. E ta dificil pa kere y accepta cu nos ta e ultimo pais pa instala un Kinderombudsman y e ley aki sigur mester y nos si lo percura pa esaki wordo trata a corto plaso pa por medio di esaki dal un paso mas den e direccion sumamente necesario pa salvaguardia e derechonan di nos muchanan.
Nos ta hasi un apelacion na comunidad pa no bira cara pa abuso di mucha. Si bo mira of ta sospecha algo por fabor hasi denuncia di esaki, nos tur tin cu hasi nos esfuerso pa cuida nos muchanan y pa ta e voz di esnan cu no tin voz.
Optional:
Nos ta hasi un apelacion na comunidad henter y tur scolnan pa tuma parti na e 1 minuut di silencio convoca pa gobierno pa tuma luga awe dialuna 27 di November pa 10or di mainta.