E exfiscal di Venezuela, Luisa Ortega Díaz, a denuncia awe e Presidente Nicolás Maduro, y hunto cune varios di su Ministernan dilanti e Corte Penal Internacional pa crimennan cometi conta humanidad, y tambe a bisa cu su Gobierno a hiba entre 2015 y 2017 un plan di “limipieza social”.
“Nan a comete crimennan di asesinato, tortura, encarcela hende, tambe un atake sistematico y generalisa contra e poblacion civil”, asina Ortega a bisa na su salida di e Corte Penal Internacional na Den Haag.
E exfiscal a bisa cu entre e pruebanan entrega tin “cartanan di dokter, cartanan di psychiatra, inspeccionnan tecnico y entrevistanan” cu victimanan, asina ela añadi dilanti di un grupo di medianan international.
Ortega a splica cu ela entrega na Ministerio Publico mas di 1000 prueba.
E cantidad di morto entre Januari 2015 y Juni 2017 ta 8000 persona y detencionnan selecta ta 17.000, den un declaracion caminda e no a acepta niun pregunta.
“Nos a haya nos mes ta acudi na e instancia internacional aki paso na Venezuela no tin husticia. No ta posibel pa sanciona e responsabel nan di crimennan aki contra humanidad”, Ortega a bisa, cu tawata fiscal na Venezuela december 2007 pa augustus 2017.
Fuera di a implica Maduro, e exfiscal tambe a entrega denuncia contra e ministernan Venezolano Vladimir Padrino López, responsabel pa defensa, y Néstor Riverol, minister di Interior y Husticia, tambe contra e directeur di Servicio di inteligencia Nacional (SEBIN), Gustavo López, y e hefe di gobierno di e Districto Capital, Antonio Benavides Torres.
“Nicolas Maduro y su gobierno mester paga pa e crimennan aki contra humanidad, pero tambe pa hamber, miseria, cu e pueblo Venezolano a wordo someti na dje”, Ortega a bisa, y na final a añadi cu ela pidi Corte “Ordo di Captura Internacional” contra esnan cu a wordo denuncia.