E grupo farmaceutico di mas grandi di henter Europa!
ORANJESTAD, Aruba: Dialuna atardi a tuma luga e firmamento oficial den cual Visser Pharma Group ta cera un aliansa strategico cu e gruponan BENU di Hulanda y BROCACEF di Hulanda. E acuerdo aki lo haci e grupo Visser hopi mas fuerte y cu mas opcion di producto y servicionan, manera nan ta conoci pe caba durante 50 aña den e industria di benta di remedi por mayor y di maneho di boticanan na Aruba, Corsou y St. Maarten.
Manera ta conoci e boticanan Visser tin e derechonan pa uza e frankisia di MediQ Apotheken na Aruba, Corsou y na St. Maarten. Recientemente e compania Brocacef a cumpra MediQ na Hulanda. Brocacef ta pertenece na Phoenix Group di Alemania, e compania farmaceutico mas grandi di henter Europa.
Phoenix Group ta opera den mayoria pais Europeo y na Hulanda nan ta conoci bou di e nomber comercial Brocacef den tur nan negoshinan di benta di productonan farmaceutico den forma di “wholesale”. Brocacef Zorginstelling ta specialisa den productonan pa Hospital y Cas pa nos Grandinan. Tambe nan ta maneha un total di 500 botica bou e nomber di BENU Apotheek y BENU Direct pa tur servicio farmaceutico entrega te na porta di cas di e pashentnan.
Visser Pharma Group na Aruba ta uza e mesun formula cu Visser Trading, cu ta maneha e actividadnan di negoshi “wholesale” na Aruba, Corsou y St. Maarten. Tambe ta maneha e 11 boticanan y Visser Home Care Center pa servicionan domestico, manera por ehempel e cuido di incontinencia.
Visser Pharma Group awor a cumpra e lisencia exclusivo pa maneha boticanan BENU riba tur tres isla y a firma un acuerdo di aliansa strategico cu Brocacef y BENU Direct pa e negoshinan di “wholesale” farmaceutico y actividadnan di “Home Care” na Aruba, Corsou y St. Maarten. Lo cambia tur e imagennan di e boticanan den e estilo BENU y lo opera nan como Boticanan BENU.
Despues di e debido consideracion a dicidi di cera contract pa tur e boticanan cu BENU y acuerdonan di alianza strategico cu BROCACEF y BENU Direct. Consecuentemente, a nombra Dalila Trinidad como General Manager Rx Wholesale pa Aruba, Corsou y St. Maarten, responsabel pa tur wholesalenan y Han Deelstra a bira General Manager Apotheekbedrijven, responsabel pa tur e departamentonan di retail y farmaceutico na Aruba, Corsou y St. Maarten.
Visser a start su operacionnan na Aruba exactamente 50 aña pasa cu 1 solo botica na San Nicolas y awendia ta maneha 11 botica. Ta bon pa anuncia cu otro aña lo habri nan di 12 botica na Corsou. Tambe awendia e ta opera 3 diferente compania “wholesale” riba tur e islanan. Awor, 50 aña despues, ta firma un “Franchise & Strategic Alliance” cu un di e agencianan farmaceutico mas grandi di mundo! Brocacef y BENU lo asisti Visser den desaroyo di su empleadonan, seminarionan di salud, introduci conceptonan nobo den cuido di pashent, enfoca riba servicio na pashent y cliente, expande den servicio na cas, asina promove mas cuido domestico, reduciendo e gastonan di cuido dor di traha di cerca cu Gobiernonan y seguronan medico.
Cu e partner nobo aki awor, Visser ta mira e siguiente 50 añanan di existencia cu hopi mas confiansa.
Riba e fotonan adhunto por aprecia momento cu Gerard Mulder, Director di BROCACEF, Mariska Meulendijk, Sales Manager Caribbean & Suriname BROCACEF y Yvonne Escalona, Chief Financial Officer di VISSER Group, a firma e acuerdo nobo aki.