Home Politics Minister Dr. Carlos “Alex” Schwengle contento cu e atencion cu ta dunando...

Minister Dr. Carlos “Alex” Schwengle contento cu e atencion cu ta dunando na nos grandinan

SHARE

A organisa e prome “Caribbean Active Aging Congress”

Mas o menos 300 persona a participa den e congreso

ORANJESTAD, Aruba: Den fin di siman a tuma luga “Caribbean Active Aging Congress”, unda cu Minister di Salud Publico, Cuido di Nos Grandinan y Deporte, Dr. Carlos “Alex” Schwengle tabata presente. E congreso tabata e prome organisa dor di Fundacion Movemiento ta Bida. A conta cu oradornan internacional y local, cu a elabora riba e actividadnan p’e comunidad cu ta birando mas grandi. Participantenan a ricibi hopi informacion y a haci hopi pregunta na e oradornan.

Minister Schwengle a splica cu e tema di e congreso aki a haya mas atencion e ultimo 4 añanan y awor a logra organisa e prome congreso di Active Aging di Caribe aki na Aruba. E ta spera cu tur aña por sigui tene esaki y cu aporte di Gobierno, pero tambe di otro organisacion manera AZV, CEDE Aruba y SVb. El a manda palabranan di gratitud na Fundacion Movemiento ta Bida, pasobra nan tin e interes pa sigui promove pa nos grandinan ta activo y cu tin hopi beneficio.

Diasabra henter dia tabatin diferente experto cu a papia riba e temanan aki, unda cu a tuma diferente dato riba e tereno cu nan sa. “Nos ta spera cu e siguiente Gobierno y Minister cu ta bay carga e responsabilidad pa nos grandinan, pa tuma e congreso aki como un start pa bin cu un programa un tiki specifico pa nos grandinan, pa locual ta toca pa bay promove pa nos grandinan ta mas activo”, asina el a expresa. Tin cifranan den mundo cu ta comproba cu entre mas e grandinan move, nan ta mas saludabel. Mas nan move, si nan cana simplemente, nan presion ta bou control, nan condicion cardiovascular ta miho y nan ta biba mas largo cu un miho calidad di bida. Ta spera cu por sigui promove e congreso aki tur aña y pasa e datonan aki den un maneho nobo pa haci nos comunidad grandi mas activo ainda.

A cuminsa cu e congreso elaborando riba “active aging”, asina Presidente di Fundacion Movemiento ta Biba, Rudy Leysner a elabora. A papia riba e discuti con un persona por envehece mas activamente. P’e congreso aki tabatin oradornan di Hulanda, Canada, Brazil, Corsou y Aruba. E participacion na e congreso aki tabata grandi. Participantenan a bisa e fundacion cu mester sigui organisa tiponan di tayernan cu ta keda capacita esunnan cu ta traha cu hende grandi. Na e congreso no a conta solamente cu presencia di hendenan grandi so, pero tambe studiantenan di Universidad di Aruba, EPI y IPA.