Home Politics MEP: NOS PRIORIDAD PA UN BON RELACION DEN REINO Y COOPERACION INTERNACIONAL

MEP: NOS PRIORIDAD PA UN BON RELACION DEN REINO Y COOPERACION INTERNACIONAL

SHARE

 

Desde 1986 cu pais Aruba a logra su Status Aparte y despues na 1996 a anula e fecha di independencia for di Statuut di Reino, e pueblo di Aruba den su mayoria ta na favor pa Aruba keda forma parti di Reino Hulandes. E relacion y aprecio di nos pueblo pa cu e famia di Cas Real, e pueblonan di Hulanda, Corsou, Sint Maarten y islanan BES lo keda e vinculo pa nos sigui traha cu otro den Reino Hulandes.

 

Den e ultimo 8 añanan, partido MEP a sa di surpasa e distanciamiento cu por tabata existi entre e partido y cierto politiconan Hulandes. Partido MEP awe ta gosa di respet grandi di politiconan Hulandes como tambe di politiconan di Corsou, Boneiro y Sint Maarten.

 

E brugnan cu a wordo construi a convence Hulanda cu partido MEP ta un partner serio den Reino y cu mester tene cuenta cu n’e.

 

Partido MEP den historia politico di nos pais a hunga un rol grandi den realisa y construi pais Aruba autonomo den Reino Hulandes. MEP ta kere den un bon relacion den Reino, basa riba madures y respet mutuo.

 

E tarea di MEP tanto den gobierno como den Parlamento semper lo ta pa cuida nos derechonan adkiri, e status Autonomo, dignidad y interesnan di nos pueblo.

 

Den nos relacion cu Reino, Statuut ta brinda suficiente espacio pa sigui traha cu otro den Reino a base di respet, den forma constructivo cu e pensamento pa hiba nos pais y Reino Hulandes padilanti.

 

Respet ta tambe tene cuenta cu e realidad di nos limitenan y nos posicion geografico y situacion geopolitico di nos region.

 

Finalmente respet kiermen tambe brinda e espacio pa nos pais por emancipa, crece y sigui desaroya.

 

Partido MEP ta kere den un bon relacion den Reino, basa riba tres principio fundamental:

 

1.Un relacion a base di respet mutuo, principalmente respetando nos autonomia.

2.Un relacion a base di madures.

3.Un relacion na unda cu por nos ta traha cu otro,  sostene otro y coopera cu otro tur caminda cu ta posibel den relacionnan internacional.

 

MEP  ta kere den Aruba como parti di Reino, cu un bon relacion den Reino, cu respet pa nos Status Autonomo y e voluntad mutuo pa coopera cu otro.