ORANJESTAD, Aruba: Minister di Salud Publico, Cuido di Nos Grandinan y Deporte, Dr. Carlos “Alex” Schwengle a topa cu e Asociacion di Volleyball Aruba den un ambiente ameno. E mandatario a haya oportunidad di combersa cu nan riba diferente topico y specialmente pa haya sa mas con e aña a bay pa nan.
Minister Schwengle conhuntamente cu Fundacion Lotto pa Deporte a haci entrega di regalo na e federacion, cu a keda sumamente contento cu esaki. Ministerio di Deporte conhuntamente cu Lotto a bin pa haci tipo di evento asina aki na final di e campeonato di futbol, unda a sinti e necesidad di duna elogio na deporte specialmente na e hobennan. A cuminsa cu futbol pero no a keda eynan so y a cuminsa haci evento pa otro deporte. A haci e encuentro aki pa taekwondo tambe, pero ainda no a yega na tur otro deporte.
E mandatario a bisa cu tur aña nan lo traha conhuntamente cu e federacionnan pa asina otorga un tiki mas elogio, un tiki mas tempo, un tiki mas atencion personal na e deportistanan. Specialmente na e hobennan cu a destaca. A reuni cu e seleccion femenino y masculino di volleyball cu a representa pais Aruba den competencia internacional y haci un bon papel. Tambe kier purba pusha e deporte di volley cu antes tabata un di e deportenan mas grandi aki na Aruba. E federacion ta trahando duro riba esaki, unda cu nan ta haciendo nan esfuerso pa trece bida nobo den e deporte aki. Na Savaneta un club nobo a keda lanta bou guia di meneer Yrausquin, kende Minister Schwengle a felicita. A cuminsa cu un club completamente nobo cu muchanan hoben y e mandatario ta spera cu nan ricibi bon sosten di e federacion, gobierno hunto cu su partnernan.