Home Uncategorized Julie de Cuba-Geerman, Candidata #3 di Partido ReD Democratico: Partido ReD...

Julie de Cuba-Geerman, Candidata #3 di Partido ReD Democratico: Partido ReD Democratico ta sostene pensionadonan (2)

SHARE

PENSION DI AMBTENAAR – APFA

“Gelijkbedrag” y “Bashi premie” desde 2015 padilanti.

Riba e pension aki e.o. Sr. Wolff a duna un splicacion amplio di su historia. Y semper hende mester sa e historia pa por defende su causa.

Cu seramento di e refineria Lago, trahadornan di Gobierno no a ricibi indexering for di 1984 pa 1995. E percentahe durante e 12 añanan a monta te banda di + 40%. Durante negociacion cu gobierno a logra di ricibi bek banda di 19%, cu inicialmente mester a bay den salario. Nan a yama esaki e inhaalmaneuvre. Despues di a ricibi percentahenan pa 2 aña den salario, gobierno a bini bek y bisa cu ta hopi duro pa hinca e inhaalmaneuvre den salario, pasobra e tin hopi consecuencia. A wordo negocia y a yega na un acuerdo cu e inhaalmaneuvre ta bai den toelagenan, manera aumento di vakantie-uitkering, 13 dianan di  ATV y varios otro toelage.

A combini cu e pensionado tambe mester goza di e inhaalmaneuvre, como cu e inhaalmaneuvre no ta bai mas den salario, pues e no ta ser calcula den su pension, manera ta e caso di vakantie-uitkering, ATV y otro areglonan cu si ta conta pa salario di e trahador. E pensionado cu a entrega durante 1984 pa 1995, no por wordo benta un banda, pero e mester sigui ricibi su parti den toelagenan. Gobierno a comprende y a crea e gelijkbedrag y bashi-premie pa pensionadonan.

Cierto momento gobierno a manda APFA un carta di dos regel bisando APFA cu personanan cu bai cu pension después di 31 december 2014 no ta ricibi gelijkbedrag, ni voorjaarspremie. APFA ta administra e gelijkbedrag y Bashi Premie pa Gobieno.

Si Gobierno kier elimina gelijkbedrag y bashi-premie pa pensionadonan, kendenan a bai cu pension na 2015 y 2016 e ta violando e motibo pakico a introduci nan un 18 pa 20 aña pasa.

Si tin sindicato cu a firma e acuerdo cu gobierno pa elimina gelijkbedrag y bashi premie pa perhudica trahadornan y pensionadonan esey ta un error grandi di e sindicato(nan), cual mester ser corigi.

Partido ReD ta comparti e pensamento aki y lo atende e asunto di gelijkbedrag y bashi premie for once and for all. Y tambe lo studia seriamente e posibilidad di baha e contribucion na AZV cu awor aki ta cai totalmente pa cuenta di e pensionado di APFA, kende ta paga full e 10,5% cu ta maximal casi AWG9000 pa aña. ReD lo kier haci uso tambe di e experticio y experencia di pensionadonan pa yuda den p.e. e control di prijs den supermercado y tiendanan a cambio di un compensacion di su gastonan. Partido ReD ta sigui sostene pensionadonan.

 

Pension Obligatorio den sector priva

Masha poco ta conoci con esaki ta bayendo. Partido ReD lo haci un inventario y evalua unda tur mester ahusta e maneho pa cu pension obligatorio den sector priva.