ORANJESTAD, Aruba: Riu Palace Antillas a organisa un training special pa su bartendernan, pa ta miho prepara den diferente tecnica con pa traha cocktails. Bartender profesional y mixologo molecular Erick Bustamante a duna e training aki di cual tabatin un participacion di 50 persona. E bartendernan participante a ricibi nan diploma di Tecnicanan di Mixology y tabata gradici pe oportunidad ricibi pa atende na e workshop aki.
E workshop tabata over di tecnicanan den mixology y tabatin como meta enfoke riba servicio, cu ta fundamental den sector turismo. Ta importante pe bartendernan ta den training constantemente pa asina nan por ofrece e miho calidad di servicio na bishitantenan. Durante e training e bartendernan a siña diferente tecnica den cocteleria, pa traha bebidanan diferente y innovativo.
Un di e participantenan tabata Alejandra Lemos, kende a haya e workshop aki hopi great. “Nos a siña masha hopi mes” E tin dos aña trahando den bar como “cocktail waiter” y akinan el a siña tecnicanan cu e no tabata sa. “Mi ta hopi contento pasobra Riu Palace Antillas ta keda upgrade su trahadonan. Den mundo di bar tur dia ta sali algo nobo. Ami ta haya hopi great cu nan ta keda siña nos y trece curso pa asina nos por duna un miho servicio”, Alejandra Lemos a expresa. Un otro participante tabata Dayver Hoyos. El a bisa cu “e workshop a bay tremendo, amazing. Mi a siña hopi cos. Con pa shake, traha cocktail, hopi cos”. Riu ta amazing, Dayver Hoyos a agrega.
E training di e bartendernan a bay den un bon ambiente y tur tabata feliz di a siña hopi tecnica. E prome dia tabata pa conoce otro y pa adaptacion. Esunnan cu a participa tabata habri pa siña y cu hopi boluntad pa haci nan trabao. Tur hende a colabora ademas di a keda cu hopi gana di por sigui siña, a bisa. E obhetivo ta pa e turistanan bay bek na nan pais cu un bunita recuerdo di Aruba, pero cu e recuerdo di nos hendenan, e mixologo a expresa.
Famia Riu a funda Riu Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion “all inclusive”. Riu Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.
Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.