Cu start di prome fase di Happy Flow Aruba un bes ta showcase pa mundo
ORANJESTAD- E prome fase di Happy Flow a keda cla y den funcion y cu esaki Aruba ta un paso mas cerca di haya su pre-clearance pa Europa. E logro di Happy Flow ta algo grandi y pa e motibo aki a bin specialmente Aruba pa celebra e echo aki President y CEO di Schiphol Group, ehecutivonan di KLM y di Aruba mes ditrector di Triple A y tambe tabata presente miembronan di e stuurgroep y ministernan Dowers y Arends. Ta un logro grandi ya cu Aruba ta e prome pais na mundo unda e sistema aki di Happy Flow a keda introduci. Hopi ta bay sigui, pero Aruba ta un bes mas e showcase pa mundo.
Prome Minister Eman tabata masha satifecho cu esaki. Tabata un inciativa di dje pa di e forma aki logra mas lihe haya e pre-clearance pa Europa. Eman: “Esaki ta un iniciativa di Aruba y ta pesey mes cu Aruba ta lidera e stuurgroep. Den e stuurgroep aki tin dos institucion hopi importante como partner: KLM y Schiphol y demas partnertnan publico y semi publico di Aruba y Hulanda. ”
Eman a splica cu gobierno a forma e stuurgroep aki pa mira con implementa un trayecto pa por yega na introduci pre-clearance pa Europa pa Aruba. “Esaki ta nifica cu nos por haya un facilidad di inmigracion y Aduana di Europa y Hulanda na Aruba haciendo e mesun trabou cu e pre-clearance Mericano. Nos ta mira con e pre-clearance Mericano a pone Aruba riba mapa internacional. Tur nos partnernan den aerolineanan ta bisa cu e echo cu Aruba tin pre-clearance Mericano ta facilita e pasahero enormemente. Esaki tin dos bentaha hopi grandi. Un ta e satisfaccion di cliente cu ta hopi halto y di dos ta cu pa aerolineanan tin un diferencia financiero hopi grandi. Cada aerolinea cu bula bay un aeropuerto na Merca tin cu paga pa cabez di pasahero cierto suma pa e proceso di tramite cu tin na aeropuerto. Si bo tin abordo pasaheronan cu a pasa e pre-clearance caba na Aruba, esaki ta reduci enormemente e gastonan cu mester paga na aeropuerto.”
Esaki sin duda ta haci Aruba hopi atractivo pa e aerolineanan y ta duna e isla un posicion di competencia mas fuerte. Eman a enfatisa cu vision di Aruba ta pa logra e pre-clearance pa Europa. “Mi ruman grandi Henny Eman tabata esun cu a busca e pre-inspection cu despues a bira pre-clearance Mericano. Naturalmente bon ehempel tey pa sigui. Ta pesey cu den nos prome periodo di gobernacion nos a inicia e proceso pa por logra un pre-clearance pa Europa ”
Eman: “E proceso ey a cuminsa cana. Nos a trece KLM hunto na mesa cu Schiphol, nos a sinta y a delinea un plan pa den fase yega na e pre-clearance pa Europa. Nos a termina e prome fase caminda nos a introduci e facilidadnan tecnologico cu por carga e aprobacion di Bruselas cu nan por mira cu Aruba tin suficiente procesonan di nivel halto den tecnologia y seguridad pa por duna e nivel di confiansa cu e procesonan cu nos ta hiba aki ta suficientemente sigura y tur checks-and-balances den dje pa nos por logra e pre-clearance Europeo. Awe nos a conclui e prome fase cu nos Happy Flow.” Eman ta convenci cu pronto Aruba ta haya su pre-clearance pa Europa. E prome paso ta tuma.