ORANJESTAD – Diahuebs mainta, 13 di maart durante conferencia di prensa di Gobierno di Aruba, Prome Minister Evelyn Wever-Croes a anuncia, cu gran honor, e publicacion di e Relato Anual 2024 di su ministerio. E Relato Anual a wordo publica cada aña desde cu Gabinete Wever-Croes ta gobernando haciendo esaki e di 7 Relato Anual cu Prome Minister Evelyn Wever-Croes ta entrega.
E relato anual aki ta duna un bista general di e trabounan, iniciativa, logronan y compromisonan di Gabinete Wever-Croes den su maneho. Prome Minister a duna di conoce cu e ta considera e Relato Anual 2024 como un traspaso na e pueblo di Aruba di tur locual e ta bin ta haciendo durante e ultimo 7 aña y mey.
E Relato Anual 2024 ta cuminsa cu un introduccion na unda Prome Minister ta resalta e resistencia y progreso di Aruba, enfatisando recuperacion economico, integridad y sostenibilidad. Tambe ta subraya esfuerso pa transparencia, anti-corupcion y desaroyo social, y e compromiso pa mehora calidad di bida di nos comunidad.
E Ministerio di Prome Minister ta consisti di cuater cartera y cada un tin un rol fundamental den gobernacion di Aruba; Asuntonan General, Innovacion, Organisacion Gubernamental y Infrastructura y Planificacion Teritorial.
Den e Relato Anual 2024, e trabou, e desaroyonan y e esfuersonan di cada cartera ta presenta den cuater capitulo bon structura, y cada uno ta refleha e compromiso pa gobernacion transparente, progreso sostenibel, y mehoramento di bida pa pueblo Arubano.
Capitulo 1; Asuntonan General: E capitulo aki ta hopi extenso y trata Acuerdo di Gobernacion, Reformanan, Relacionnan den Reino, tambe Relacionnan Exterior y e crisis den Sur America. Tambe e capitulo ta trata Wetgeving, DWJZ, Siguridad Nacional, Veiligheidshuis y Crisis Management Office. Otro paragraaf ta trata Ombudsman, Comunicacion y Comisionnan cu Prome Minister a crea por ehempel e actiecomité Hondenverordening y Comision Nacional di Autismo. Na cierre di capitulo 1, Prome Minister ta compara e gastonan di su ministerio cu e ministerio di e Prome Minister anterior, señor Mike Eman.
Capitulo 2; Innovacion: Aki ta duna relato di Directie voor Innovatie, unda ta trata Futura y EduTech y e-Government.
Capitulo 3; Organisacion Gubernamental: Aki ta papia di Departamento di Recurso Humano, Personeelslasten, Bureau Interne Diensten (BID), CENSO, MFA y Hulpbestuurskantoor.
Capitulo 4; Infrastructura y Planificacion Teritorial, ta referi na Directie Infrastructuur en Planning (DIP), Dienst Landmeetkunde en Vastgoedregistratie (DLV) of Cadaster, Dienst Openbare Werken (DOW) y Dienst Technische Inspecties (DTI).
E relato anual ta finalisa cu un bista riba 2025 (Vooruitblik 2025) na unda cu ta indica kico ta spera pa aña 2025.
Prome Minister:
“Mi ta gradici tur esnan cu a haci posibel e publicacion di e Relato Anual e ultimo 7 añanan. Cu e Relato Anual e legado ta skirbi y niun hende por cambi’e nunca mas. Manera semper, un copia lo wordo entrega na Gobernador di Aruba y na Biblioteca Nacional pa asina e legado di locual ami ta bin ta haciendo desde aña 2017 como Prome Minister di pais Aruba ta eynan pa futuro generacionnan por tuma bon nota di dje”.
Por lesa y download RA 2024 riba:
