Home » POR den proximo gobernacion ta bay Adapta y modernisa e areglo di canasta basico pa esnan di menos recurso tambe tin acceso na cuminda saludabel y nutritivo

POR den proximo gobernacion ta bay Adapta y modernisa e areglo di canasta basico pa esnan di menos recurso tambe tin acceso na cuminda saludabel y nutritivo

by sxm
0 comment 55 views

Pa loke ta e maneho cu POR ta ofrece comunidad pa e proximo gobernacion, a publica e plan di gobernacion Vision 17-21 Hunto Nos Por. E documento aki ta encera preocupacionnan cu comunidad a indica como prioridad pa wordo atende cu ne. E plan di gobernacion ta hopi amplio y ta atende diferente punto. Si ainda bo no a haya oportunidad pa lesa esaki den e articulo aki ta presenta  e segmento di ‘Asunto Social’ cu ta encera ideanan nobo y innovativo y tambe e aspecto di conscientisacion.

Lo bay stimula esnan cu ta cobra onderstand cu tin capacidad pa subi mercado laboral, pa haci esaki mediante combinacion di labor, recapacitacion y bijstand pa un periodo di un aña, den sentido cu ta subsidia dunado di trabou cu e suma di bijstand pa asina yega por lo menos na e salario minimo. Ademas lo reforsa Enseñansa pa Empleo (EpE) pa e departamento aki por facilita y sostene e proceso aki. Percura pa famianan cu yiu chikito por haci uzo di centro di cuido di mucha di calidad (creche). Lo crea e oportunidad pa mayor cu ta biba bou di bestaansminimum, mediante nan dunado di trabou, lo por aplica pa un toeslag riba nan salario. E dunado di trabou lo por deduci esaki for di su impuesto. Di e forma aki por percura pa eficiencia y productividad den e area laboral.

Tambe lo enfoca riba adaptacion y modernisacion di e areglo di canasta basico pa esnan di menos recurso tin acceso na cuminda saludabel y nutritivo, intensifica control y bin cu ley pa sostene esaki. Hunto cu esaki conscientisa e consumidor a base di publicacion mensual di lista di prijs di producto di supermercadonan como tambe reforsa y promove Dienst Huur- & Consumentenzaken (DHC). Adicionalmente stimula creacion di un organisacion independiente di y pa consumidor.

Reforsa y sostene e posicion di centro di barionan como pilar di convivencia den comunidad y duna nan e tarea pa conscientisa nos comunidad di e importancia di esaki. Reforsa nan posicion di centro di desaroyo y educacion comunitario. Crea sinergia entre organisacionnan gubernamental y no gubernamental den sector social pa asina traha hunto y mas eficientemente

Educacion social

Reforsa Multidisciplinair Centrum (MDC) pa por duna mas asistencia na muchanan cu problema di comportacion y ofrece enseñansa na midi. Ofrece cursonan con pa traha presupuesto como tambe hermentnan pa forma y educa famia (inclui mama y tata soltero). Introduccion di un programa di enseñansa despues di orario di scol cu lo sostente e curiculo basico. Lo evalua necesidadnan y puntonan di mehoracion.

Pa loke ta nos muchnan y hoben

Introduci rapidamente un defensor di mucha pa sigura implementacion di tratadonan di derechonan di mucha. Enfoca riba prevencion di abuso di mucha y hende muher, embaraso hubenil y adiccion di droga y alcohol. Conscientisa esnan vulnerabel den nos comunidad di nan derechonan y posibilidadnan di sosten y ayudo social. Reforsa y duna atencion na Voogdijraad pa e por eherece su funcion na un forma mas efectivo, unda e tarea principal ta pa sigura e bienestar di e mucha. Reforsa posicion di Departamento di Asunto Social pa inclui punto di sosten den barionan como tambe promove sinergia cu Departamento di Labor.

Nos grandinan tambe ta ricibi atencion den e plan di gobernacion di POR unda cu lo crea y sostene centronan di cuido pa nos grandinan. Enfoca riba nan necesidadnan y fomenta e personal cualifica necesario pa traha den e centronan aki. Enfoke riba calidad di cuido pa nos grandinan cu kier keda biba independiente den nan propio hogar, pero cu mester cuido diario necesario. Esaki lo yuda baha presion riba e lista di espera na centronan di cuido pa nos grandinan.

‘Vision 17-21 Hunto Nos Por’ ta publica completo riba Facebook Page di POR E Forsa Nobo y por lesa esaki riba celular tablet of computer.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio