Home » Elton Lioe-A-Tjam (ABO): No laga esunnan cu a kita democracia di pueblo, gana atrobe!

Elton Lioe-A-Tjam (ABO): No laga esunnan cu a kita democracia di pueblo, gana atrobe!

by sxm
0 comment 59 views

E observacion ‘Manera partido ABO ta ocupa e puesto mas abou riba e lista di sosten, cu esaki no kiermen cu pueblo no kier mira partido ABO den eleccion’, haci pa un persona trahando den prensa diahuebs pasa, ta ilustra un biaha mas e deficiencia di nos sistema democratico y e continuo intento pa sigui influencia e pueblo malamente. Pasobra e esun cu a haci e observacion tendencioso aki, a lubida pa inclui algun aspecto hopi esencial den su ‘analisis/conclusion periodistico’ of kisas intencionalmente esakinan no a wordo inclui pa asina sigui pinta un imagen negativo di partido ABO, manera sa pasa regularmente. Loke e persona aki a lubida ta:

  1. Ainda firmantenan tin te diamars 8.30 PM pa bin duna sosten. Pues yena lista prome of ultimo no ta bisa nada di e escogencia di pueblo dia di eleccion;
  2. E prome dianan di inscripcion, algun partido a haci’e casi imposibel pa laga pueblo duna sosten na otro partidonan. Pa esunnan cu no sa of cu no tabata presente na Censo, tabatin un carnaval total, un rancamento di cakiña formal y intimidacion di hende;
  3. Tambe hopi hende no ta di acuerdo cu e forma con e dunamento di duna sosten a wordo organisa. Den e forma actual, tur hende por mira na cua partido un persona a duna sosten. No tin ningun sorto di privacidad. Y a pesar cu algun hende kier pretende cu no tin persecucion politico na Aruba, e ta existi;
  4. Partido ABO no a paga, priminti un cos, uza vinculonan (of presion) comercial pa trece trahado Censo of organisa un tipo di rifa pa atrae firmantenan;
  5. Partido ABO tampoco tin e medionan financiero of campañadonan pa pasa busca firmantenan na cas of trabou pa hiba firma;
  6. Partido ABO tampoco tin vinculonan special cu cierto partido tradicional, cu a percura pa manda nan sostenedonan firma lista.

Tur firmante di partido ABO, ta hendenan cu ta reconoce e trabounan semanal, desde 2014, y cu si ta kere cu ainda tin personanan integro cu kier sirbi e pais aki dignamente, enbes di nan mes.

Na diferente ocasion, partido ABO a bisa cu e asunto di esun cu haya mas voto mester drenta den parlamento lo drecha nos democracia, ta nada mas cu decoracion y manipulacion politico. E asunto aki nunca tabatin e intencion pa trece mas democracia pa pueblo. Si di berdad tabatin boluntad y sinceridad pa duna pueblo mas democracia, anto dicon gobierno y parlamento no a percura pa elimina e obstaculo di firma di sosten na solamente Censo prome cu eleccion? Dicon no a percura pa e partidonan sin representacion den parlamento, entrega un lista di sosten cu identificacion, manera ta sosode na diferente pais caba enbes di molestia e ciudadano bay Censo? Dicon no a percura pa habri algun hulpbestuurskantoor y MFA, pa asina esunnan cu menos recurso of cu no tin transport, tambe por a bay firma pa un partido? Dicon gobierno no por a percura pa Censo keda habri riba diasabra pa asina tur esunnan cu ta traha durante siman, por a bay duna nan sosten na un lista? E ultimo aki ta bira mas remarcabel ora pueblo por a mira cu algun siman atras, gobierno si a percura pa Censo keda habri riba diasabra pa asina tur hende por a bay registra pa participa na eleccion 2017. Pero awor diripiente gobierno a scoge pa no duna e ciudadano e mesun facilidad aki pa bay firma pa un partido riba un diasabra y asina duna e electorado mas escogencia dia di eleccion.

Nos tur sa cu na Aruba tin un pobreza grandi y cu e postura aki di gobierno pa limita e posibilidad pa esunnan di menos recurso, ta mustra claramente cu gobierno y e ‘establishment politico tradicional’, a scoge pa castiga esunnan di menos recurso. Si esunnan di menos recurso (cu alabes ta forma e mayoria di e electorado) kier un cambio politico, e lo tin cu paga pe. Na Censo so, unda no tin suficiente luga pa para auto, unda tin cu paga parkeermeter y durante oranan di trabou. E postura tuma aki di parti di gobierno y e ‘establishment politico tradicional’, ta mustra cu democracia activo no ta conta pa e mayoria di pueblo. E mayoria di pueblo solamente ta sirbi pa haya nan voto.

Tambe un analisis di lista di firmantenan, lo confirma e ponencia aki y alabes mustra cu mayoria di e firmantenan ta biba pabou di brug. Partido ABO ta sigur si e analisis aki wordo haci y publica pa ‘Electorale Raad’, e ponencia aki lo wordo confirma y asina henter pueblo por mira cu e firmamento di lista ta meramente un otro instrumento pa laga un parti di pueblo pensa cu e tambe ta participa na e proceso democratico y cu nos tin democracia aki na Aruba.

Pues ciudadano, ainda bo tin te diamars anochi 8.30 PM pa mustra cu bo kier tin mas escogencia di 22 september y cu corupcion gubernamental pa no por tapa cu ‘klinkers’ y asfalt. Si por, yuda trece esunnan cu no tin transporte Censo. No laga esunnan cu a kita democracia di pueblo, gana atrobe!

 

(www.aboaruba.org, [email protected])

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio