Home » Moderna y Merck ta revela vacuna contra cancer basa riba mRNA cu ta reduci cu e ta plama

Moderna y Merck ta revela vacuna contra cancer basa riba mRNA cu ta reduci cu e ta plama

by Admin
0 comments 228 views

E vacuna mRNA Intismeran di Moderna ta mustra resultado prometedor, reduciendo e regreso y expansion di melanoma den prueban clinico di fase avansa.

Moderna y Merck a anuncia cu un vacuna personalisa di cancer basa riba mRNA, yama Intismeran, a reduci e riesgo di cancer di cuero (melanoma) bolbe y e cancer plama den otro parti di curpa den un prueba clinico di fase final. E resultado ta un gran exito den un campo nobo di tratamento di cancer y a haci e accionnan[shares] di Moderna subi hasta 160 porciento.

Resultado preliminar di e estudio, publica Diarason, a haya cu e tratamento a logra ambos meta: reduci e riesgo di cancer bolbe y preveni e tumor di plama. E resultado detaya di e estudio ainda no a wordo publica, pero segun e fabricante di e medicamento, ta spera cu nan lo comparti esaki durante un proximo reunion medico.

Presidente di Moderna, Stephen Hoge, a bisa cu miles di pashent cu a laga kita tumor di melanoma di halto riesgo durante cirugia por beneficia di e vacuna pa otro aña, si e vacuna wordo aproba pa e autoridatnan regulatorio. Segun e National Cancer Institute, na 2023 tabatin mas cu 1.5 miyon hende na Merca ta biba cu melanoma.

Desaroya hunto cu e gigante farmaceutico Merck, Moderna a test e vacuna hunto cu e medicamento di inmunoterapia Keytruda.

E vacuna experimental ta entrena e sistema inmunologico di e pashent pa combati tumor, apuntando na mutacionnan den celulanan di cancer. Enfokenan similar ta wordo getest tambe pa combati otro tipo di cancer, manera cancer di pulmon, pecho y pancreas.

Estudionan anterior a sugeri cu vacuna di mRNA por yuda e sistema inmunologico reconoce y ataca celulanan di cancer den raton y den analisis di registro medico di pashentnan cu cancer.

E resultadonan di e estudionan a bin na un momento cu e gobierno di presidente di Merca Donald Trump a corta financiamento pa investigacion riba mRNA.

E desaroyo ta e prome resultado positivo di un prueba clinico di fase final pa un vacuna di cancer basa riba mRNA. Merck a bisa cu e dos companianan ta den combersacionnan caba cu e autoridatnan regulatorio tocante e tratamento.

Karen Knudsen, CEO di Parker Institute for Cancer Immunotherapy, a bisa cu e resultadonan di Moderna por marca e inicio di un era nobo pa trata cancer di tumor solido.

“E resultado positivo aki ta hiba nos realmente pa e proximo fase den inmunoterapia,” Knudsen a bisa. “Esaki ta un inicio hopi prometedor – aki ta unda cosnan ta cuminza.”

You may also like