Home » Historia di Aruba: Drama familiar, Homber recientemente casa a mata tata di su casa

Historia di Aruba: Drama familiar, Homber recientemente casa a mata tata di su casa

Hopi problema, insulto y alcohol tambe a hunga un rol

by Admin
0 comments 4.5K views

E historia di Aruba aki, ta trata di un drama familiar, di un homber hoben  di 28 aña cu no tabata tin famia ta biba na Aruba y tabata recientemente casa, bibando den  cas di su suegro, cu no tabata kier  pa e la casa cu su yiu muher y den e hogar aki constantemente tabata tin problema, cu hopi insulto y te hasta bringamento, te un dia cu e problemanan a escala y bay full for di man.  E amor di e pareha recien casa tabata hopi grandi cu e homber hoben aki su casa tabata conte y confi’e tur cos. 

E nombernan ta fictisio, e acusado nos lo yama Raul, suegro nos lo yame Juancho, e swa Bernardo y e casa di e acusado nos lo yame Anita.

 

 

Raul ta un Colombiano cu a bin biba na Aruba, e tabata tin  28 aña y e tempo ey, recientemente casa cu Anita. Anita tabata yiu muher di Juancho. Anita cu Raul tabata un pareha hopi enamora, tur cos Anita tabata confia Raul. Despues cu nan a casa manera hopi pareha di e tempo ey, cu no tabata tin hopi entrada pa huur of cumpra un cas, tabata bay biba na cas di nan suegronan of mayornan. Raul a bay biba hunto cu Anita na e cas di e mayornan di  Anita. Esaki tabata e eror di mas grandi cu nan por a comete den nan bida, pero nan tabata jong y no por a premira kiko lo bay pasa, ambos tabata tin yen di soño pa futuro.

Boliviastraat, Oranjestad; unda tur cos a sosode, tur cos a cuminsa riba e diabierna 06 di december 1974, for di mainta trempan Juancho y su yiu Bernardo a start un racha di bebemento di rom y for di mainta nan tabata busca Raul y Anita problema. Nan tabata insulta Raul y Anita masha hopi mes, un sin fin di tiramento di palabra pa motibo cu Anita tabata hopi mas jong cu Raul.  Raul durante henter dia prome cu e la bay traha, e la keda contene su mes pa no cay den nan provocacionnan.  Hopi trempan Raul a dicidi di bay trabou pa asina evita cualke confrontacion cu su suegro y su swa.  E la despedi di Anita y a bise cu e te mey anochi e lo traha dje e lo bin cas.

Anita a keda cas y mester a sigui scucha y soporta insulto di su tata y su ruman homber cu tabata pata pata caba. Esaki tabata algo cu Anita ya tabata custuma for di jong cu ne, cu su tata y su ruman homber grandi ta dos hende cu ora nan dal nan betro nan ta bay for di control y ta pasa busca hende problema. E la keda keto y scucha tur e insultonan.

Poco despues di mey anochi Raul a caba di traha y a bin straight cas. Na yegada e la topa su suegro, su swa y un homber mas para pafo di cas ta papia. Asina mes e la bisanan bon nochi y a bay paden. Anita tabata lanta ta wardando su casa pa  mesora conte tur locual henter dia Juancho y Bernardo tabata bisa di dje, cual sigur tabata trata di hopi insulto. E marduga aki Raul no tabata solamente cansa di trabou, pero mas cansa di wanta insulto nan hopi baho di su suegro y su swa. Raul despues di a tende tur cos, mas sigur lo a haya miedo cu su suegro of swa lo por haci’e cualke daño, e no a confia, despues cu e la kita su flannel, e la coy un cuchiu hinke den su paña, e la bisa Anita cu e mester bay pafo pa pishi, mirando cu su suegro awo no kier pa e uza e w.c. paden di cas mas.

Ora e la yega pafo, Juancho y Bernardo a cuminsa provok’e y nan a bula riba dje, mas sigur pa agredi’e, hopi lihe bringamento formal aki a  bay full for di man, Raul a saca e cuchiu y a hinca su suegro na su barica move e cuchiu bay mas ariba pasa su boca di stoma bay, esaki mesora tabata tin consecuencia fatal pa Juancho. Juancho a cay muri mesora na e sitio mes. Hopi lihe polis a yega na e cas den Boliviastraat, aki nan a bin topa cu Juancho benta abou den plas di sanger y no tabata duna señal di bida mas y tambe nan a topa Raul, nan a detene y a confisca e cuchiu.

E sitio a wordo cera pa haci mas investigacion, durante cu polisnan tabata haciendo investigacion nan a bin topa cu un cuchiu mas. Un miembro di famia a bisa polis cu esaki tabata un cuchiu cu ora Juancho tabata burachi, e tabata gusta cana rond cu ne, pero cu mayoria di biaha e casa of un di e yiunan tabata sconde esaki pa Juancho no haye, vooral ora e tabata burachi. E anochi aki si niun y ni Raul no a mira Juancho cu e cuchiu aki den su poder. Raul a wordo transporta pa warda di polis, caminda recherchenan a cuminsa cu e interogacionnan cu a dura varios siman. Despues  di algun dia e la wordo hiba Huis van Bewaring caminda e la keda cera.

Tres luna despues di e tristo sucedido, e caso a wordo trata den corte, pa ser exacto riba diabierna 7 di maart 1975. E abogado defensor tabata Abogado Tjon Ajong, Durante tratamento di e caso  hopi cos a bin sali na cla. Raul tabata casa cu Anita y Juancho no tabata contento cu e matrimonio aki, pa motibo cu Anita ta mucho jong, durante e caso a trece dilanti tambe cu den e cas constantemente tabata tin problema y hopi pleitamento cu insultonan hopi mahos, vooral ora cu Juancho cu su yiu homber tabata bou influencia di alcohol. Alcohol a hunga un rol grandi den e caso aki. E problemanan a escala te bay for di man cu consecuencia cu e la costa bida di Juancho.

For di e raport di reclassering a bin resulta cu Raul ta un homber hopi trankil y sumamente amabel, tambe cu nunca a yega di haye den problema cu husticia.  Su doño di trabou a declara cu e la keda babuca, con Raul por tabata envolvi den un caso di asesinato, un crimen asina grandi. Fiscal mes a nota cu Raul  a presenta su mes como un homber hopi trankil, cu tabata duna tur cooperacion y tabata contesta tur pregunta sin cambia. E la haye hopi sabi, paso na momento cu fiscal a puntre  dicon e la coy e cuchiu bay cu ne pafo, aki si e la duna un contesta un poco impreciso. Na momento di pidi castigo pa Raul, Fiscal a tene cuenta cu e situacion insoportabel den e cas y a compronde tambe tur e tension cu e tabata biba cu ne den e cas, cu esaki tabata sigui crece y na dado momento e la bira di mas pa e por a soporta. Pero tambe di otro banda fiscal a tene cuenta cu e forma con e la hinca e victima ,cu tabata cu hopi forsa y a move e cuchiu di su barica bay ariba te pasa su boca di stoma.  Aki Fiscal a haya, cu pa su persona e ta un prueba cu aki tabata trata di un asesinato. Asina mes teniendo cuenta cu ambos banda, Fiscal a dicidi di pidi Hues, un castigo menos pisa cu ta di 4 aña di castigo di prison, kitando e lunanan cu ya e tabata den voorarrest.

Su abogado tabata S.H. Tjon Ajong a hiba e defensa y a bisa cu e motibo principal tabata ta cu su cliente y  su casa no por a haya nan propio hogar pa biba y cu e no ta di acuerdo cu Ministerio Publico, cu ta bisa cu su cliente intencionalmente kier a mata su suegro.  E abogado a sigui bisa cu si e tabata tin e intencion di a mata su suegro, e lo tabata sa di hinca e cuchiu den su pecho banda links cu ta den su curason. E abogado no ta hay pa culpa su cliente di asesinato pero cu por bisa cu tabata trata di maltrato cu morto como consecuencia. Na final Hues a cera e tratamento di e caso bisando cu despues di 14 dia e lo duna e sentencia.


Esaki a sosode tambe riba diabierna 22 di maart 1975, net 14 dia despues di a trata e caso den corte, den oranan di mainta hues a dicta sentencia, Raul a haya 4 aña di castigo di prison, kitando e lunanan cu e la sinta caba.

You may also like