E articulo aki ta pa recorda y honra e bidanan cu a bay perdi den trafico insigur di Aruba, prome cu a haci un cantidad di cambio cu awendia tin e cantidad di morto den trafico toch basta bou control. Lamentabelmente nos ta 48 aña mas leu y ainda tin hende iresponsabel, cu ta core auto bou influencia, cu velocidad halto, no ta respeta regla di trafico y e trend awendia hit and run, pa e motibonan ey, ta sigui pasa accidentenan riba nos isla.
Entre 1970 cu 1980, tabata e temporada cu e trafico na Aruba tabata hopi insigur, durante e decada aki Aruba a conoce un cantidad di accidentenan fatal cu a marca historia, tin algun cu te awe ainda tin hende ta papia di nan. Hopi famia tabata keda den tristesa grandi atras. Gobierno di Aruba di e tempo ey hunto cu Cuerpo Policial a cuminsa cu campañanan intensivo di concientisacion. Gobernantenan tabata pidi pa bin cu hopi mas control den trafico y cu cos no por a sigui asina. Aruba su trafico tabata hopi insigur, weekendnan un cantidad di accidentenan, cu no solamente dañonan material pero perdida di bida mayoria di nan tabata hoben. E motibo principal door di core auto irresponsabel, bou influencia of cu velocidad hopi mas halto cu ta wordo permiti, tambe tabata tin e historia di pustamento di auto, den oranan di marduga den cual varios hoben a perde nan bida.
Na 1976 tabata tin como 34 morto den trafico ora a kere cu esey tabata e record. Aruba a wordo sorprendi pa un otro aña cu tabata 1978, e aña cu a kibra tur record y te na 2026 no a sosode asina hopi accidente mas, na 1978 trintiseis (36) persona a perde nan bida, di mucha chikito te adultonan mayor. Anto na 1978 un isla chikito cu e cantidad di auto e tempo no tabata pasa 20 mil auto.
E prome accidente fatal a sosode riba e weekend di 7 pa 8 di Januari 1978, na Savaneta.
E aña 1978 a cuminsa cu e prome accidente fatal den e weekend di 7 pa 8 di januari, un cabayero di fam Henriquez riba e caminda di Jaraweg a perde su bida, E victima tabata den su pickup y a lora dilanti di un otro auto, e impacto tabata hopi fuerte cu pon e pickup bolter. Henriquez a fayece mesora. Henriquez. Durante e weekend aki tabata tin como 20 accidente di trafico. Un total di 7 chauffeur cu a ocasiona e accidentenan tabata bou influencia di alcohol y nan tur 7 a wordo deteni y hiba warda di polis. E automobilistanan iresponsabel a keda cera te ora cu nan buracheria a pasa.
Dia 25 di januari 1978 un señora di 83 aña di edad a wordo alcansa pa un auto y a fayece
E di dos accidente fatal pa 1978 a sosode riba 25 di januari den oranjestad, na altura di Zoutmanstraat, pa mas o menos 8 or di mainta e señora Croes Dirks (83), a bay crusa caminda y no a ponde tino cu net e momento ey tabata biniendo un auto y a wordo alcansa pa e auto . E la keda gravemente herida y a wordo transporta cu hopi urgencia pa Dr. Horacio Oduber Hospitaal, pero na yegada a constata cu e senjora a fayece. Señora Croes Dirks a bira e di dos morto di trafico den 1978
Dia 6 di februari 1978, un motoclista (40) a wordo alcansa pa un auto y a fayece mesora na e sitio
Dialuna 6 di februari den careda di 7’or di anochi, e homber di fam Koolman tabata bayendo pabou riba e caminda principal di San Nicolas pa Oranjestad, na altura di Pos Chikito un auto di direcion contrario no a mira e brommer biniendo di pariba y a bay pasa auto, na momento cu e la hala na su man robes pa pasa auto, e la bin topa cu e brommer, e impacto tabata hopi fuerte y e consecuencianan horibel, e motociclista un di su brasanan a kita for di su curpa. Koolman a fayece na e sitio mes. E chauffeur di e auto tambe a keda herida y a wordo transporta cu ambulance cu urgencia pa hospital y a keda interna. Koolman a bira e di 3 morto den trafico pa 1978.
Dia 10 di februari 1978, hoben (19) a fayece na hospital despues di a wordo gedal cu auto.
Diadomingo 4 di februari den orannan di atardi despues di Carnaval, tres hoben tabata canando riba e pida tera canto di caminda bayendo direccion di Hooiberg caminda nan ta biba. diripiente e hobennan a wordo sorprendi pa un auto cu a baha caminda y a subi e pida tera aki, E chauffeur a dal e hoben Croes di 19 aña, lagando e gravemente herida. E la wordo transporta cu ambulance pa hospital, caminda e la keda interna pa algun dia, asina luchando pa su bida. Diabierna den oranan di mainta e hoben di fam Croes a perde e bataya y a fayece. E hoben aki a bira e di cuater persona cu a fayece den trafico insigur di Aruba na 1978
Dia 21 di februari un otro hoben di 21 aña a perde su bida den e trafico insigur di 1978
Diamars den careda di 4’or di atardi a sosode un accidente hopi serio riba e caminda principal di Oranjestad pa San Nicolas na altura di Airport di Aruba. Den e accidente aki e mucha homber hoben P. De Jong (21) a perde su bida. E victima su tata e tempo ey tabata directeur di Fatum.
E accidente a sosode riba e caminda dobbel, na momento cu e la a subi e caminda, e la wordo sorpresa pa un auto biniendo frontaal riba dje, for di direccon contrario, direcion di San Nicolas. Aparentemente e chauffeur aki lo a ekiboca di caminda y a drenta e caminda di trafico contrario. E la dal frontal contra e auto di De Jong cue consecuencianan fatal. De jong a keda gravemente herida, cu hopi urgencia e la wordo transporta cu ambulance pa hospital, pero lamentabelmente na yegada e la fayece. E chauffeur di e otro auto F.T. cu a ocasiona e accidente a keda mesora deteni pa controla si e por tabata bou influencia. De Jong tabata traha como accountant na un compania di contruction. De jong tabata e di 5 morto pa 1978.
Dia 5 di maart dos hoben ta perde nan bida den un accidente na Savaneta, velocidad halto a hunga un rol importante
Diadomingo den careda di 4’or y 45 di mainta riba e caminda paden di Savaneta, e conocido Rondeweg, na altura di Brisas del Mar, un auto tabata bayendo direccion pariba, cu velocidad hopi halto, den e auto tabata tin 4 mucha homber basta hoben.
E chauffeur di e auto tabata di fam Duyn(21) di Savaneta, kende tabata un mecanico di profession. E otro hobennan tabata un hoben di apenas 17 aña di fam Maduro, cu tabata biba na Noord den Frankenstraat, Maduro tabata asistente di un Carnicero. Tambe den e auto tabata tin e hoben di fam Colina di Savaneta di 23 aña y un otro hoben di fam Flanders di 20 aña y tabata biba na Cura cabay.
Segun informacion di polis di e tempo aya, e cuater hobennan tabata bayendo direccion pariba y cu velocidad hopi halto. Na altura di ex Brisas del Mar, poco mas pabou di Zeerover, nan a perde control, baha caminda y a bay dal contra un muraya. E consecuencianan tabata devastador. E chauffeur y a hoben sinta net su tras di fam Maduro a fayece mesora na e sitio, nan a keda mal pega den e auto. E tempo ey trabounan di polis tabata wordo hopi stroba pa tanto mirones cu tabata yega na e sitio. APa por a saca e dos curpanan for di e auto a dura como 1 ora y mey.
E otro dos heridonan a wordo transporta cu urgencia pa hospital , especialmente e hoben Colina su situacion tabata hopi critico y a wordo interna den Intensive Care unit pero tabata teme pa su bida. E hoben Flanders a keda levemente herida, pero asina mes a keda interna na Hospital. E dos hobennan Maduro y Duyn a bira e di 6 y 7 morto den trafico pa anja 1978.
Dia 12 di Maart 1978, un otro golpi pa nos isla, atrobe dos morto den trafico,
Diadomingo algo pasa di mey anochi den careda di 12’or y mey , un otro hoben di 20 aña Erasmus di Spaans Lagoen a perde su bida. E victima tabata canando cu dos amigo direccion di su cas y segun autoridad aparentemente e lo tabata bou influencia di alcohol. E hoben Erasmus di golpi a dicidi di bay drumi riba caminda na e crusada peligroso di pos chikito, di su cabes pa heup tabata net riba e caminda, Net na e momento ey tabata biniendo un auto for di direction di Oranjestad. E chauffeur na prome instante no a mira e hoben drumi riba caminda, pa ora cu e la mir’e ya tabata laat y no por a kita mas p’e. E auto a pasa riba e hoben cu consecuencia fatal pa Erasmus, kende a bira e di 8 victima di e trafico insigur di 1978.
Erasmus no tabata e unico, cu a fayece e dia aki. Algo prome cu diadomingo ta cera, den careda di 8’or di anochi, na Tanki Leendert, un homber di 28 aña, di fam Jacopucci, tabata coriendo su bais sin lus, na momento cu e kier a subi caminda grandi, e la wordo alcansa pa un auto y a keda gravemente herida. Cu urgencia ambulance a transporte pa hospital, caminda un rato despues a fayece. Jacopucci tabata e di 9 morto den trafico pa aña 1978. Den e 71 dianan di 1978, Aruba a conoce 9 morto den e trafico insigur na 1978.
Otro hoben envolvi den e accidente di 5 di maart a fayece
Despues cu e hoben Colina di 22 aña a lucha mas cu dos siman pa su bida riba 21 di maart den oranan trempan di mainta E la perde su bataya. Colina a fayece di e heridanan ricibi den e accidente riba 5 di maart na Savaneta, den cual dos di su amigonan a fayece mesora. Colina a bira e di 10 morto den trafico di 1978.
Miembro di Eilandsraad J. Croes (44) ta perde su bida den un accidente di trafico na Pos Chikito.
Diahuebs den oranan di merdia pa atardi a sosode un accidente hopi serio riba e caminda principal di Oranjestad pa San Nicolas. Na Altura di Pos Chikito, tres auto tabata envolvi den e accidente di trafico aki. E miembro di eilandsraad a fayece mesora den su auto. Dos persona mas a keda herida di cual un su situacion tabata hopi critico, ambos a wordo transporta cu urgencia pa hospital. Despues di a logra saca e defunt for di su,e auto a keda completamente destrui. Sr. Croes a bira e di 11 morto den trafico pa 1978.
Un biaha mas un persona ta perde su bida den un accidente na Pos Chikito, e biaha aki un hoben di apenas 18 aña,
Diadomingo 14 di mei 1978, a bolbe sosode un accidente fatal na Pos Chikito, E accidente a pasa algo prome cu mey anochi. E hoben di fam Webb (18 ) a fayece den e accidente aki y tabata biba den Bellisimastraat na San Nicolas.
Prome cu e accidente, nan tabata 6 amigo den auto cu tabata bayendo nan cas, despues cu nan a baha un di nan amigonan bandi panort di e caminda principal di Pos chikito, e 5 otro amigonan a sigui caminda pa San Nicolas. E hoben M.G.(18) tabata, tras di stuur, e auto tabata di dje pero e no tabata tin rijbewijs. M.G. tabata biniedo di e banda di panort cu intencion di lora pa bay pariba, dus direcion di San Nicolas, no lo a pone tino cu net na e momento cu e tabata subiendo e caminda principal di pabou tabata biniendo un auto. M.G. a sali dilanti di e auto.
E impacto tabata inmenso y fatal pa Anthony Webb, kende tabata sinta na banda di e chauffeur y a ricibi tur golpi fuerte. Wevv a fayece mesora den e impacto aki, mientras su 4 amigonan a keda herida y tur a wordo transporta cu hopi urgencia pa hospital. E chauffeur di e otro auto, kende tabata un trahado di LAGO y tabata bayendo su trabou, tambe mester a ricbi tratamento medico. E hoben Webb a bira e di 12 morto den trafico pa 1978.
Mama cu yiu envolvi den accidente, mama a fayece na e sitio, mientras yiu a keda seriamente herida
Diadomingo 25 di juni 1978, den careda di 5’or y mey di atardi, riba e caminda Kibaima pa Tanki Flip, a sosode un accidente fatal na altura di Rooi Bosal. Señora Maduro di 45 aña hunto cu su yiu muhe di 8 aña a sali for cas pa bay cumpra pan. Sra. Maduro tras di stuur di su auto a sali for di un caminda di santo, pa subi e caminda principal, net na momento cu e tabata subiendo e caminda, e no lo a ripara cu for di direcion di Drive in tabata biniendo un auto. E chauffeur di e auto no por a haci nada mas y a dal cu velocidad halto contra e auto di Sra. Maduro. E impacto tabata na e banda di patras y tabata asina fuerte cu e auto di e mama cu yiu a bay para como 50 meter mas leu y a bay pega contra un sero. E yiu muhe a wordo saca for di auto y a keda gravemente herida. Mientras cu e mama a fayece mesora na e sitio. Señora Maduro tabata e di 13 morto den trafico pa 1978.
Tres mucha homber hoben ta perde nan bida den un accidente di trafico
Den oranan di marduga di diamars 27 di juni, 1978 pa ser exacto 1’or y 45, habitantenan di Tanki Leendert especialmente esnan cu tabata biba den area di e conocido crusada peligroso di Tanki Leendert. (Awendia rotonde Tanki Leendert) a wordo spierta pa un zonido hopi fuerte. E zondido fuerte na momento cu dos auto a dal contra otro, den e accidente aki 3 hoben a perde nan bida. Dos hoben di 21 aña y un di 22 aña.
Den un auto tabata tin e victima Ramada (21), den e otro auto tabata tin e victimanan Franken (21) di Tanki Flip, Tromp(22) di Reamurstraat y tambe un otro hoben mas, kende tabata e unico cu a sobrevivi e accidente horibel aki.
aki.
E accidente a sosode na e ex crusada, e chauffeur di fam Ramada a subi e crusada cu velocidad halto sin duna preferencia na e auto riba e caminda di preferencia den cual Franken, Tromp y un amigo mas tabata den, e impacto tabata semi frontal y hopi fuerte, cu e autonan a keda completamente destrui. Tur tres victima a fayece mesora na e sitio. Franken, Tromp y Ramada tabata e di 14, 15 y 16 morto den trafico pa 1978.
Auto a bolter den oranan di marduga y te den oranan di merdia a logra topa cu e curpa sin bida di e chauffeur
Den oranan di anochi di diahuebs 29 pa diabierna 30 di juni 1978, a sosode un otro accidente fatal. Trafico di Aruba na 1978 tabata hopi insigur, den un siman 5 persona a perde nan bida den e trafico insigur na Aruba.Diabierna den oranan di mainta den mondi na Barcadera a bin topa cu un auto gebolter, den e auto por a nota varios rastro di sanger fresco, pero no a topa cu niun person den of cerca di e auto.
Mesora polis a cuminsa cu un investigacion. E auto tabata un auto di huur, polis a tuma contacto cu e compania di huur y a bin sali na cla cu un hoben marinier di Savaneta Kamp a huur e auto aki. E hoben Charles van der Pal (20) a huur e auto aki. E hoben no tabata na Savaneta Kamp y ningun persona e mainta aki no tabata sa di su paradero. Polis a check cu hospital si acaso e lo por a yega eynan, pero nada. Mientras cu polis tabata haciendo mas investigacion, un grupo di agente policial a cuminsa cu un buskeda rigoroso den e mondi den e area cu e auto a bolter. Lamentabelmente te den careda di 1 ‘or y mey di merdia a bin topa cu e curpa sin bida di e chauffeur, di 20 aña yama Charles van der Pal, e la bira e di 17 morto di trafico pa 1978
Señora di edad a bin Aruba pa entiero di su ruman, tabata envolvi den un accidente y a fayece
Diabierna 7 di juli, den Bernhardstraat na San Nicolas na altura di ex Linda Selfservice, E dama Van Putten di 64 aña a bay crusa caminda y a wordo alcansa pa un auto y a keda gravemente herida. Mesora ambulance a transporte cu hopi urgencia pa hospital, pero na yega e la fayece. E mas tristo tabata cu Sra. Van Putten tabata biba na St. Eustatius y tabata na Aruba pa entiero di su ruman homber.
Dialuna 10 di juli entre 11’or y 12’or di merdia, famia y amigonan por a despedi di Van Putten, na e mortuarium di Zepp Wever, den Zandstraat. Prome cu e la wordo transporta cu ALM pa Sint Maarten y for di Sint Maarten cu Winnair pa St. Eustatius, unda e la wordo hiba na su ultimo luga di sosiego. Sra. van Putten tabata pa hopi aña juffrouw di scol na Sint Eustatius.
Sra. Van Putten a bira e di 18 morto den trafico pa 1978
Australiano biba na Aruba a bolter cu su auto den Colony y a fayece
Diasabra den oranan di anochi, trafico insigur na 1978 a cobra bida un di e homber Australiano, Francis Bruce Benfield, kende a bolter cu su auto den sero Colorado, un poco pazuid di unda antes tabatin e luga di bowling den Sero Colorado/ Colony. Benfield a fayece mesora na e sitio. Francis Benfield tabata biba na Aruba y tabata traha na LAGO. Benfield a bira e di 19 morto di trafico pa 1978.
Hoben di 20 aña envolvi den accidente serio despues di mas di un luna a fayece
Diahuebs 8 di juni den oranan di merdia a sosode un accidente hopi serio na Santa Cruz na altura di Rooi Bosal. Un auto, un truck di carga y un dumptruck tabata envolvi. E truck di carga no a duna un auto cu tabata riba caminda principal preferencia y a lora su dilanti, den e impacto fuerte e truck di carga y e auto a bay dal contra un dumptruck cu tabata staciona canto di caminda. Un di e ocupantenan di e truck di carga un hoben di fam Silliee (20) a keda seriamente herida, cu urgencia a wordo transporta pa hospital, aki e la wordo interna den un situacion hopi critico, pero a keda lucha pa mas cu un luna pa su bida, pero lamentabelmente dia 21 di Juli 1978 e la perde su bataya y a fayece. E hoben Silliee a bira e di 20 morto den trafico pa 1978.
Accidente serio, mama a fayece mientras yiu a keda gravemente herida
Dialuna 07 Augustus den careda di 2’or y cuarto di merdia, na altura di e crusada di Pos chikito a sosode un accidente hopi serio entre dos auto, den un di e auto nan tabata tin un pareha hoben cu nan yiu homber chikito. E mama a keda seriamente herida, mientras su yiu homber tambe tabata seriamente herida, cu urgencia nan a wordo transporta pa hospital. E situacion di e mama tabata hopi critico mes.
E chauffeur di e otro auto a keda levemente herida y a wordo trata na e Eerste hulp post di Lago. Mama y yiu a keda interna na hospital, e situacion di e mama tabata hopi critico y lamentabelmente entre diamars anochi pa diaranson marduga, e mama di 26 aña di fam Pieternella van Pinxsteren a fayece. E tabata casa cu un corporal y recientemente nan yega na Aruba. E dama Pieternella van Pinxsteren a bira e di 21 morto den e trafico na Aruba pa aña 1978.
Un biaha mas un hoben marinier (21) a perde su bida den un accidente na Savaneta
Diaranson 9 di augustus den careda di 8’or y mey di anochi, e marinier di 21 aña Cornelis de Veth a fayece na Dokter Horacio Oduber Hospital. E hoben aki dia 16 di juli a accidenta cu su auto na Savaneta. E la dal contra un muraya di cas cu su auto, e accidente aki a sosode riba e caminda patras den e area unda antes tabata Brisas del mar, e caminda miho conoci como rondweg di Savaneta. E la wordo transporta den un situacion hopi critico pa hospital, caminda e la wordo interna y a fayece. Cornelis de Veth tabata e di 22 morto di trafico pa 1978
Tata di famia a bay crusa caminda na Paradera y a wordo alcansa pa un auto fatalmente
Diaranson 6 di september 1978 den careda di 9’or y mey di anochi, e tata di famia di fam Paesch a bay crusa e caminda principal di Paradera, net na momento cu tabata biniendo un auto. Aparentemente e no lo a mira e auto y a crusa, e la wordo gedal pa e auto y a keda seriamente herida, por bisa cu na e sitio mes e lo a fayece caba. E accidente aki a sosode na altura di ex Via Paradera Rumshop, caminda actualmente ta Botica Paradera. Theodoor Paesch tabata e di 23 morto di trafico di 1978.
Dama a caba di traha, na caminda pa bay cas ta accidenta y ta fayece.
Diasabra 16 di september, den careda di 6’or y mey di atardi a sosode un accidente fatal, den cual e dama di fam Croes di 26 aña a perde su bida. E accidente aki a sosode riba e caminda di Moko pa Calbas. Dos auto pa falta di duna preferencia a boks, e impacto tabata hopi fuerte y tabata net na e banda drechi di e auto, den cual e dama Croes tabata sinta. Croes y e chauffeur a wordo transporta den un situacion critico pa hospital. Un ora mey despues cu e victimanan a yega hospital, Croes a fayece. E chauffeur tambe a wordo interna den cuido intensivo. Croes tabata biba na Ayo y segun nos a compronde e lo tabata traha na Artistic Boutique na playa y e chauffeur di e auto lo a buske na trabou, y despues di a baha un of mas persona lo tabata bayendo direcion di Ayo pa hiba Croes, pero lamentabelmente e nunca a yega su cas. E dama Croes tabata e di 24 morto di trafico di 1978, cu tabata e aña mas insigur di trafico cu Aruba a yega di conoce.
Un simpel accidente a resulta fatal pa un homber turista
Diamars, 26 September 1978, den careda di 2’or di merdia riba e skina di ex Strada (awendia Zara) a sosode un accidente. Un turista Harry Zupker a bay crusa caminda y a wordo alcansa pa un auto. Na prome instante e accidente aki no tabata mustra serio y cu e victima no tabata grave. E la wordo transporta cu ambulance pa hospital pa asina ricibi un checkeo medico mas avansa, pero despues di su yegada na hospital su situacion a cuminsa bira mas y mas serio, cu pa 6′ or y 10 di atardi, e la fayece. Zupker tabata un pasahero di e crucero Royal Vickingstar cu tabata na Aruba pa un dia. E victima a nace na Russia y a wordo naturalisa como cuidadano Mericano. Zupker a bira e di 25 morto den trafico pa aña 1978.
Persecusion di polis tras di un motociclista a resulta fatal pa un hoben di apenas 16 aña
Diahuebs 28 di september 1978, den careda di 6’or di atardi a sosode un accidente fatal entre un brommer y un auto. Esaki a sosode net dilanti di e entrada di e cura di Maria College den Van Leeuwenhoekstraat. E hoben di fam Loopstok di apenas 16 aña a perde su bida.
Un rato prome un patruya di polis lo a mira e hoben aki riba un brommer den Adriaan Lacle Boulevard y segun un agente den e patruya, e hoben lo a pasa den luz cora bay direcion pariba den Nassaustraat( awendia Caya G.F. Betico Croes), e hoben lo tabata bayendo direcion di su cas. E patruya a sigui e brommer y asina a cuminsa un persecusion. E patruya tabata tras di e brommer, e hoben tabata biba den Nassaustraat mes, ma sigur lo a spanta y no a bay para na su cas, pero a sigui core rond den e area di Magrietschool cu awendia ta Arco Iris Kleuterschool. E la pasa den Pasteurstraat, drenta den Dr. Henriquezstraat, di susto e la dal contra un pickup staciona, aki e la hera perde control cu su brommer, pero asina mes e la logra sigui y a pasa riba e tereno habri pabou di La Fama y a subi Van Leeuwenhoekstraat.
Polis a sigui su tras, mientras e hoben den su ansha y miedo pa polis par’e, no a mira cu net na e entrada di e cura di Maria College tabata tin un auto di un meneer di scol sortia pa drenta e cura di scol. E hoben riba e brommer no a controla su velocidad na tempo y a dal cu su brommer patras di e auto di e meneer di scol, e impacto tabata asina fuerte cu e la bay dal hopi duro contra e glas di patras di e auto.
Den un situacion hopi hopi critico e hoben aki a wordo transporta pa hospital y tabata teme pa su bida, lamentabelmente algo pasa di mey anochi a drenta e informe cu e hoben Loopstok di 16 aña a fayece. E la bira e di 26 morto den trafico pa 1978.
Chauffeur burachi, sin rijbewijs a subi acera y a dal tres hoben di cual dos hoben a fayece mesora na e sitio
Diadomingo 5 di november 1978, den careda di 2′ or y 50 di marduga, tres hoben tabata canando na Santa Cruz bayendo cas y na altura di e bocht peligroso di Santa Cruz nan a wordo alcansa pa un pickup, dos hoben a fayece mesora na e sitio y un a keda gravemente herida. E chauffeur R.P. di 22 aña tabata bou influencia y no tabata tin rijbwijs.
E chauffeur R.P. tabata den un pickup y door cu e tabata burachi a hala dimas na su man drechi dal contra e troittoire y dje a hala bay links di caminda te subi e trottoire dal e tres hobennan. Tur 3 hobentabata muchanan di Santa Cruz, un tabata e damita Winterdaal di apenas 13 aña, kende tabata biba un poco mas pazuid di unda e accidente a sosode. E otro hoben cu a fayece tabata tin 17 aña di fam Figaroa, E otro hoben a sobrevivi e accidente pero ta keda gravemente herida tabata di fam v.d. Biezen. E la wordo transporta cu urgencia pa hospital. E hobennan tabata alumno di La Salle College.
Dr. Ridderstap cu tabata biba cerca di unda e accidente a sosode a yega na e sitio y a constata morto di e dos victimanan. Polis a detene e chauffeur bou influencia y sin rijbewijs pa mas investigacion. E morto di e dos hobennan aki a sacudi, a trece un tristesa enorme Dialuna mainta na La Salle College, nan tabata alumnonan hopi keri, e tabata un sla no solamente pa Santa Cruz, pero pa henter Aruba. Riba ambos dia di entiero por a mira un cantidad grandi di muchanan cu a bay despedi di nan dos amigonan di scol stima . E dos victimanan hoben aki a bira e di 27 & 28 morto den e trafico insigur di Aruba di 1978.
Homber di 67 aña ta perde su bida den un accidente na Pos Chikito
Diasabra dos di december 1978 den careda di 6’or y mey di mainta a sosode un accidente entre dos auto na Pos Chikito. Esaki a sosode na altura di Oduber Weldingshop. Den e impacto fuerte un homber di fam Cambridge di 67 aña a perde su bida, Cambridge tabata biba na Village Zuid. E la muri mesora na e sitio. Tres otro persona a keda seriamente herida y mester a wordo transporta cu hopi urgenciacu ambulance pa hospital. Mr. Cambridge a bira e di 29 morto den trafico pa aña 1978.
Trafico insigur di 1978 a cobra bida di cuater hoben riba e caminda principal di Oranjestad pa San Nicolas, na altura di e brug
Diasabra 09 december 1978, algo pasa di 3’or di marduga, na altura di e brug, e tempo ey e brug nobo riba e caminda principal di San Nicolas pa Oranjestad, net panort di Tele Aruba. Aki a sosode un accidente horibel den cual 4 hoben a perde nan bida. Dos Auto coriendo cu velocidad hopi halto a dal frontal contra otro. Dos hoben a muri mesora na e sitio mientras e otro dosnan a fayece na yegada na Hospital.
Pa mas o menos 3’or y 10 di marduga un hoben di fam Croes, kende tabata traha na Strandhotel ( Talk of the Town)y tabata biba den Johan de Witstraat, e tabata tras di stuur di un Mazda blanco, cu e la fia di un amigo. Na prome instante despues di e accidente a pensa cu ta e doño di e auto tabata envolvi den e accidente y a fayece, pero hopi lihe a bin haya sa cu e doño ta na bida y cu ta su amigo di fam Croes tabata den e auto. No ta descarta e posibilidad cu Croes por a pega soño tras di stuur y a hala cu velocidad halto bay dal frontal contra e Volkswagen cu tabata biniendo di direcion contrario. Den e Volkswagen tabata tin 3 hoben, e marinier di fam Cabenda cu tabata biba na Mount Scenerystraat, un hoben Lacle kende tabata waiter na Tamarijn Beach hotel y tabata biba na Watapanagezaag. E di tres persona den e Volkswagen na prome instante no por a wordo identifica, tabata te den oranan di mainta cu polis por a identifica e di 4 victima como Hirschfeld di Mount Scenerystraat.
Ambos auto a keda completamente destrui. Na e sitio a cuminsa un investigacion y por nota presencia di Comisario di Polis di e tempo ey Wiels, inspector Willems y Heskens tambe oficier di Justitie mr. Hoogland.
Den un solo tiro 4 hoben a perde nan bida. Velocidad halto, por ta alcohol, cansancio, soño tabata of por tabata un di e motibonan di accidente aki. Niun a keda bibo pa por a conta kiko por a pasa. Croes di 22 aña, Lacle di 21 aña, Cabenda di 22 aña y Hirschfeld di 23 aña a bira e di 30, 31, 32 y 33 morto di trafico insigur di 1978.
Hoben a bolter cu su brommer y a fayece, velocidad halto a hunga un rol
Diadomingo 17 di December 1978, den careda di 1’or y 45 di merdia, e trafico insigur di 1978 a bolbe cobra bida di un hoben di fam Werleman di 21 aña y tabata biba na Cashero, Werleman tabata traha na TEC. Diadomingo merdia e tabata coriendo cu su brommer di ayo direccion Tamarijn. Pa motibo di velocidad halto a perde control den e bocht y a bolter cu su brommer. E la keda gravemente herida y den un estado hopi critico a wordo transporta cu ambulance pa hospital. Lamentabelmente pa mas o menos algo prome cu 3’or di atardi, e hoben aki a fayece. Werleman a bira e di 34 morto den trafico y e di 24 persona hoben cu ta perde nan bida den trafico pa 1978.
Chauffeur a hit and run, e victima a fayece na yegada na hospital
Diahuebs 21 di December 1978 den oranan di merdi pa atardi, un homber di fam Maduro tabat canando na Macuarima y a wordo alcansa pa un auto, e la keda gravemente herida y cu sumo urgencia e la wordo transporta pa hospital, pero lamentabelmente na yegada e la fayece. E chauffeur di e auto P.B. no a para y a sigui core, pero un rato despues e la presenta na warda di polis, declarando cu e la spanta ora e la dal e homber y di susto e la sigui core. E cabayero Maduro tabata e di 35 morto den trafico pa 1978.
Dokter tras di stuur a dal un homber cu auto y e homber a fayece, iluminacion pober di caminda tabata e motibo
Diahuebs 28 di December 1978 den careda di 9’or di anochi, riba e caminda bieu di Holiday Inn pa bay Malmok, un poco mas panort di Holiday Inn, e homber di 49 aña di fam Trimon, cu tabata biba na Westpunt, a bay crusa e caminda pa asina bay su cas, pero lamentabelmente e la wordo alcansa pa un auto. Trimon a fayece mesora na e sitio. E chauffeur di e auto cu tabata un dokter, kende a constata morto mesora na e sitio. E dokter a pone e curpa sin bida canto di caminda, a sigui core bay su cas pa yama ambulance y polis, despues a regresa na e sitio. E tempo ey e caminda no tabata tin un bon iluminacion y anochi, den e area por tabata hopi scur y peligroso pa motibo cu hopi piscado di Nort cu tabata biba den area di Westpunt Rooi Santo, Salinja Cerca etc. tabata pisca te anochi y despues mester a crusa e caminda pa bay nan cas. Trimon tambe a crusa eynan y mas sigur pa falta di un bon iluminacion a wordo alcansa pa un auto. Trimon a bira e di 36 morto den trafico pa aña 1978.
1978 a bay den historia como e aña cu a kibra record di accidentenan fatal, e tempo ey Aruba tabata tin como 60 pa 65 mil habitante. E motibonan principal di e cantidad grandi accidentenan aki, tabata mayoria parti e coremento di auto iresponsabel, cu velocidad halto, bou influencia y e infrastructura di e camindanan tabata laga hopi di desea, crusadanan peligroso, camindanan den mal estado, caminda smal, bochtnan demasiado skerpi etc.
Di e 36 victimanan, 24 tabata hendenan hoben. Mester bisa si cu poco poco a cuminsa bin cu mas y mas concientisacion, mas control di trafico y tambe e gobiernonan a drecha e infrastructura di e camindanan hopi, a bin cu mas caminda asfalta, mas luz di trafico, a traha un cantidad di rotonde, a haci camindanan mas hancho of di dos via, tambe a pone mas borchi di trafico, mas iluminacion riba caminda etc. pa por a baha e cantidad, di morto den trafico. Durante e decada di 70, casi tur aña e cantidad di mortonan den trafico tabata pasa 20 y varios aña e la yega casi 30 of te pase, na 1976 tabata tin 34 morto den trafico. Lamentabelmente cu tanto bida a wordo perdi den trafico prome cu por a controla y baha e cantidad aki den añanan 80 bay ariba. Ban spera cu nunca mas Aruba lo mester conoce un aña cu tanto morto asina den trafico.














