Home » Historia di Aruba: Chef Cook Schizofrenico a mata su colega y a hink’e den un freezer na Sheraton Hotel

Historia di Aruba: Chef Cook Schizofrenico a mata su colega y a hink’e den un freezer na Sheraton Hotel

by Admin
0 comments 3.6K views

Durante e decada di 70 pa 80, Aruba a conoce varios actonan criminal, hopi serio y cruel. Djis e tempo aya no tabata tin internet y e noticianan no tabata wordo publica mesora of no completo. Den e añanan aki  corant tabata e unico medio di comunicacion, den cual por a lesa noticianan di polis. Riba dje cu e corantnan pa un tempo basta largo tabata wordo imprimi na Corsou y cu avion nan tabata yega Aruba. Tambe algun tabata wordo imprimi na Hulandes.

Esaki hopi biaha tabata manera dificulta pa un parti di pueblo haya e noticianan aki hopi lihe. Hopi noticia di Aruba mes ta via radio of tabata pasa di boca pa boca, asina hendenan tabata wordo poni na altura.

E biaha aki nos lo dedica historia di Aruba, na un caso hopi lamentabel cu a sosode na Sheraton hotel na 1971.

Den e historia aki ta trata di unicamente dos persona , un Chef Cook cu nos lo duna un nomber fictioso di Rene y un Koki cu su fam ta Rohrer nos lo mantene su fam. real.

E koki a cuminsa traha na Sheraton y problema a start
1 di Oktober 1971,  e Koki di fam Rohrer, a yega Aruba e  tabata tin 25 aña di edad. Rohrer a nace y a studia na Suissa, e la bin Aruba pa traha como Koki na Sheraton Hotel. Rohrer a bay biba den un cas di huur hunto cu un colega di dje, cu tabata un chef cook na e mesun hotel y tambe tabata di Suissa. E chef Cook Rene di 26 aña, tabata tin un tempo caba bibando na Aruba. Hopi lihe Rohrer a cuminsa haye den problema cu Rene, segun Rene, Rohrer tabata gusta descrimina y tabata haci cosnan di floho y esaki tabata trece basta discussion entre e chef y e koki.

Supuesto secuestro y ta pidi 20 mil florin
Riba 4 di november 1971, Rene a bati alarma bisando cu e koki  Rohrer lo a wordo secuestra. Segun su persona un hende lo mester tin Rohrer wanta un caminda. Mesora gerente di hotel a tuma contacto cu Polis. Polis a haya e cuenta di secuestro aki, un caso hopi insolito. Segun Rene e secuestradonan a tuma contacto cu su persona y a bise cu si nan kier mira e koki Rohrer  bibo bek, nan mester paga 20 mil florin cash, prome cu 9’or di mainta y te hasta a duna indicacion unda  mester deposita e suma aki.

Gerente di hotel man na cabes
E secuestro aki a laga e gerente di hotel hopi preocupa, for di oranan trempan di mainta, e hotel manager tabata man na cabes buscando un forma pa cera e suma aki prome cu 9’or di mainta.  E tempo ey e suma aki tabata mucho grandi, e hotel no tabata tin tanto cash asina aki den cas. E hotel manager a acerca banco, pero no tabata posibel pa cera e suma aki prome cu 9’or di mainta. Na prome instante a pensa cu por ta trata di un joke laf, pero toch e recherchenan di e tempo ey a tuma e caso aki hopi na serio.

Hunto cu diferente departamento di Polis, nan a cuminsa cu un buskeda rigoroso rond di Aruba, pa e Koki secuestra.

No a bay cas
Mientras cu e buskeda tabata tumando luga, e recherchenan toch no a confia y a dicidi di cuminsa cu un investigacion tamce den e hotel mes. Locual a hala e polisnan nan atencion, tabata cu e auto di e victima (e koki Rohrer) tabata staciona ainda na e hotel y e yabi di e auto a wordo haya na hotel mes.

Eynan un lus a cende cerca e recherchenan, asina nan a comproba cu Rohrer no a bandona e hotel, dus for di  diaranson  3 di november, e no a bandona e hotel. Rene ta e persona cu a yama polis y tambe ta esun cu a entrega un keho official cu su colega a wordo secuestra. E tabata e unico persona cu tabata tin contacto cu e supuesto secuestradonan.

Curpa sin bida den freezer
E team di recherche cu tabata investigando e caso, no a confia e declaracionnan di Rene,  especialmente caminda e ta bisa cu e la busca den full e hotel y no a topa cu Rohrer. E investigacion den e hotel a sigui y durante cu nan tabata buscando den e hotel nan a bin topa cu un plas di sanger, esaki a ponenan teme pa lo peor.  Nan a sigui busca y den un storeroom bandona a bin topa cu un freezer riba wiel, ora a habri e freezer ta bin haya  e curpa sin bida di Rohrer,  cu ya tabata mas o menos un dia morto. E homber a wordo mata un un forma hopi violento. E descubrimento aki a laga tur e trahadonan di e hotel y tambe henter Aruba den un shock.

Mesora polis a bay pa Rene y a deten’e como e sospechoso principal di asesinato. Durante interogacionnan a bin sali na cla cu Rene y Rohrer pa algun dia caba tabata tin basta problema cu otro. Segun e investigacion di recherchenan, mas sigur e asesinato a tuma lugar den careda di mey anochi y despues Rene lo a hinca e curpa sin bida den e freezer y a core esaki, hib’e den e storeroom bandona. Tambe for di e investigacionnan a sali na cla cu algun hotel guests a mira Rene sali cu e freezer for di e e edificio di e hotel y cu e tabata pushe y a hibe den e storeroom bandona banda di e hotel.  Autoridad a mustra e testigonan e freezer den cual a haya e curpa y nan a confirma cu esey tabat e freezer cu nan a mira e chef cook pusha y hiba den e storeroom bandona.

Admiti di a mata
Diabierna 5 di november 1971, e sospechoso principal Rene  a admiti cu e la mata su colega Rohrer.  E mesun mainta aki autopsia a wordo haci tambe riba e curpa  y e resultado tabata cu Rohrer a fayece door di a wordo strangula y su craneo tabata basta kibra.

Rene a keda casi un aña den voorarest, y te oktober 1972, e mester a presenta den corte.

Den corte
E caso tabata riba diabierna 13 di oktober 1972 y e caso aki a haya hopi atencion na Aruba. Na momento cu e la drenta den corte, e la duna un impression di ta un persona hopi calmo y cu tabata expresa su mes corectamente. E la papia hopi trankil, maske su bon comportamiento  no a yuda sauvisa e acusacionnan serio cu tabata tin contra di dje.

Durante cu Huez a trata e caso, e sala di corte tabata yen di personanan cu kier a sigui e caso aki di hopi cerca, especialmente e gerente di e hotel. Rene a haya un tolk Aleman.

Schizofrenia
Segun raportnan psikiatrico di expertonan, Dr. De Windt y Dr. Buma, e homber aki ta sufri di e malesa mental schizofrenia y a actua den un momento di locura. Nan a pone enfasis cu Rene mester di tratamento urgente, cu si e la comete un delito of no. E mas importante ta cue  mester wordo trata cu hopi urgencia.

Fiscal a pidi huez pa no sigui cu e caso den corte, pero pa laga e acusado wordo interna mesora na Rustoord na Corsou, esaki cu un aña di prueba. E abogado defensor tabata di acuerdo pa interna su cliente na Rustoord, pero a bisa Huez cu su famia lo prefera pa e wordo interna den un institucion den exterior, sea na Hulanda of na Suissa.

Pati cabra pa habri cabes y strangula cu un waya di hero
Durante e tratamento di e caso, segun Fiscal, Rene a discuti e anochi ey cu Rohrer, despues cu e la caba di discuti y e tabata completamente calmo. E la tuma un rato pa analisa e situacion y  despues e mes a bay agredi su victima, den un forma hopi cruel. E la bati su victima  varios biaha cu un pati cabra di hero hopi duro riba su cabes, te kibra su craneo y cu esaki no tabata suficiente, despues e la pasa man pa un pida waya di hero y a lore rond di e nek di su victima, e la rek e waya, te ora cu  e tabata sigur cu Rohrer no tabata hala rosea mas. E prome acusacion, tabata pa asesinato, y subsidia cu homicidio y tambe pa maltrato fisico hopi pisa.

Rene a conta cu prome cu e la bin biba y traha na Aruba, e tabata traha na Bahamas, caminda tabata tin hopi descriminacion entre hende blanco y hende di color. E tabata haya esaki horibel y no tabata por cu e descriminacion aki,  pesey e la dicidi di kita for di trabou na Bahamas y a bin traha na Aruba.

Descriminacion
Na Aruba, despues cu Rohrer a bin traha cu ne na Sheraton, e la nota cu Rohrer tabata gusta descrimina hende di color y esaki tabata pone Rene rabia masha hopi mes.  Rene a conta den corte cu e no por a soporta con Rohrer tabata descrimina otro coleganan di color.  Rene mes tabata loco enamora di un dama di color, el a conta den corte cu e la haya un accidente di auto na Aruba y a haya hopi sla na cabes. E mester a keda como 32 dia den hospital.  Aki e la conoce un verpleegster local, cu no tabata hende blanco y nan a namora di otro. Un dia Rohrer a mira un potret di dje cu su enamorada y ora e la puntra Rene ken e dama aki ta, Rene a conteste cu “ esaki ta  e amor di mi bida”, .Rohrer na su turno a hari’e y a bisa” ay Bullshit ohm”  pa motibo cu e dama no tabata hende blanco.  Esaki a pone Rene haya mas rabia riba dje.

Den Corte Rene a sigui declara, cu esey no tabata tur, pero cu Rohrer tabata un persona hopi floho den su trabou y como cu Rene tabata su chef, na prome instante e la trata na yude, pero ora e la ripara cu nada no ta yuda,  e la dicidi di lage pa su cuenta y e mes tabata haci e trabou cu Rohrer no kier haci.

Accidente y bida no tabata facil
Den Corte Rene a declara cu door di e accidente di auto,  e la keda cu un debe di 5 mil florin y tabata sinti’e hopi deprimi. E mes tempo e tabata mucha no tabata tin un bida facil, su famia tabata hopi pober. Tin ora nan no tabata tin ni pa come. te cu e la haya problema cronico di stoma.

Den corte  Fiscal a lesa un declaracion cu Rene a haci dilanti Rechter Commissaris, bisando cu riba 3 di November 1971, e tabata bayendo dokter pa su problema di stoma y aki e la cuminsa planea con e ta bay mata Rohrer.. Pero Rene den corte a bisa Huez cu e no ta corda cu e la declara esey.

Blackout?
Un cos si cu e la corda tabata cu na dado momento, e la cana bay tras di Rohrer cu tabata bayendo den e walking freezer. E victima no por a scucha cu e tabata su tras pa motibo cu e motornan di e freezer tabata haci hopi desordo. Segun su persona di eynan e la haya un blackout y no ta corda nada mas, te ora e la mira Rohrer morto dilanti dje benta abou. E ora e la realisa cu e mes lo mester a haci’e, mirando cu no tabata tin niun otro hende presente.

Na e momento ey huez a puntre si e kier mira e potretnan un biaha mas di e sucedido, pa wak si e por corda algo mas, pero e la contesta huez cu e ta prefera di no miranan mas, pa motibo cu, e prome biaha cu e la mira e potretnan e la bira full malo y a gradici huez cu e no mester miranan mas.

Declaracion di su plan
Tambe huez a puntr’e over di e plan di secuestro y pidimento di placa na e gerente di hotel acambio. Huez a lesa un parti di su declaracion di algun dia despues di e asesinato. Segun su declaracion dilanti autoridad, e la manda e personal di cushina, un poco mas trempan cu normal cas, esaki lo a sosode relaciona cu un fiesta di despedida di un otro koki y segun su declaracion esaki no tin nada di haber cu e asesinato.  Huez na su turno, a bisa cu esaki no tabata berdad y cu e tin di haber cu e asesinato, pa e por a keda su so cu Rohrer y asina por a ehecuta su plan sin problema. E resto di su plan tabata pa bisa cu e koki ta secuestra y cu nan ta pidi 20 mil florin pe y cu e 20 mil florin lo mester a wordo laga un caminda na e schietbaan na altura di Palm Beach Club y e la declara cu e mes lo a sali busca e cent.

E parti di e plan kiko e lo a haci cu e curpa, e mes lo a bay saca e curpa for di e freezer y lo a core hibe Palm Beach Club y yama anonimo bisa e gerente di hotel, cu e koki secuestra a wordo mata. Segun e acusado e no ta corda nada di e declaracionnan aki.

Ladronicia y traha sin dia liber
Den corte despues cu hues a puntre riba su declaracionnan anterior, e la bolbe bay riba e situacion di trabou, e la bisa Huez cu hopi cos tabata wordo horta for di e Food storeroom y cu e tabata responsabel pa esaki. Segun e, e fout tabata sinta na e administracion cu tabata permiti nan horta for di e Food store room.  Administracion y parcialmente e victima Rohrer tabata responsabel pa cu esaki. Ademas tabata tin hopi pression riba Rene, e tabata trahando 2 aña y mey sin un dia liber y tabata traha  entre 10 pa 16 ora pa dia. Especialmente e dianan prome cu e asesinato, e tabata tin 3 dia trahando sin por a bay cas drumi, pa motibo cu hopi cos tabata wordo horta y e kier a haci investigacion kendenan tabata horta for di e food store room.

Bevelhallucinaties
Huez a haya e raport di e expertonan tremendo y e conclusion di e raport tabata cu Rene di berdad tabata un persona schizofrenico. Den añanan 70,  e tabata un malesa cu nan no tabata compronde mucho bon y cu no tin cura y solamente cu remedi por a controle. E patientnan hopi biaha ta haya molester di bevelhallucinaties, nan ta scucha stem cu ta bisanan kiko nan mester haci y hopi biaha nan no por keda sin hacie.  Fiscal a puntra un di e expertonan si ta e schizofrenia a pone cu Rene a mata su colega?. E la contesta cu si den e caso aki sali na cla cu si e la mata of no a mata mes, mester tene na cuenta cu door di e Schizofrenia e ta capas di mata, y cu e mester tratamento pa cu esaki y cu hopi urgencia.  Den corte nan remarca cu Rene ta mustra hopi calmo,  un di e expertonan a splica cu e ta bou influencia di remedinan hopi fuerte, cu ta tene hopi calmo.

E expertonan a bisa cu sin duda e homber aki ta sufri di schizophrenia y cu nan a constata un cantidad di sintoma di enfermedad aki cerca dje.

Segun Fiscal, asesinato no tabata prueba, pero si homicidio, tambe e la bisa cu e raport psikiatrico ta haci e henter e caso mas duidelijk y comprendible. Fiscal a pidi huez pa para di persigui’e den corte y retira e caso aki, pero a cambio interne pa minimo un aña na Rustoord, paso e ta sufri di e malesa aki y tin mester di tratamento.

Rustoord
Segun su abogado, su cliente no ta un criminal y Rustoord no ta apto pa trat’e. E  la pidi  pa e wordo interna y haya  tratamento na un instituto specialisa na Hulanda of Suissa.  Te hasta segun e abogado, e famia di Rene ta dispuesto pa paga y duna full nan colaboracion pa e por haya e tratamento na un instituto na Hulanda of Suissa.  Ministerio publica, no tabata mucho di acuerdo  pa cu esaki, pero Huez lo mester a dicta sentencia.

Sentencia di 1 aña
Dia 20 di oktober 1972, Hues a dicta cu no lo sigui persigui’e den corte, pero cu mesora e mester wordo interna den un instituto pa personanan cu ta sufri di  enfermedadnan mental esaki pa  un tempo di prueba di un aña.  Fiscal a pidi pa e wordo interna mesora na Rustoord, pero su abogado a pidi pa e wordo interna na un instituto, pa pashentnan cu problema psikiatrico na Hulanda of Suissa, y cu e famia di Rene a keda di duna tur e cooperacionnan necesario y financieramente pa asina translade pa un instituto na Hulanda of Suissa. Huez Fränckel a duna sentencia, pero den su sentencia e no a menciona na cua instituto e mester wordo interna.

 

 

Fuente: Verslag di polis 1971, Amigoe di Curacao y algun fuentenan anomino, 

Ilustracion: Online y via colecion di Biblioteca Nacional

You may also like