Squats, lunges y otro ejercicio di forsa por haci un diferencia grandi pa bo salud.
Segun un estudio nobo conduci pa investigadornan di Harvard y otro institucionnan internacional, solamente entre 90 y 120 minuut di entrenamento di forsa pa siman por baha significativamente e riesgo di morto prematuro.
E estudio, cu a sigui mas cu 147.000 participante durante 30 aña, a descubri cu personanan cu haci entrenamento di forsa regularmente tabata tin:
* 13% menos riesgo di morto pa cualkier causa.
* 19% menos riesgo di morto debido na enfermedadnan cardiovascular.
* 27% menos riesgo di morto debido na enfermedadnan neurologico.
Entrenamento di forsa ta inclui actividadnan manera levantamento di peso, uso di banda di resistencia, of ejercicio cu ta uza solamente e peso di bo mes curpa, manera push-ups, squats y lunges.
Sin embargo, e investigadornan a descubri cu e resultado nan mas impresonante a wordo mira den personanan cu tabata combina entrenamento di forsa cu actividad aerobico. Entre e actividadnan aerobico tabatin caminda rapido, jogging, core, landa, bicicletea, tennis, squash y subi trapi.
Segun e investigadornan, e riesgo di morto tabata e mas abou den e grupo cu tabata haci ambos tipo di actividad. Nan a indica cu e combinacion di entrenamento di forsa y actividad aerobico ta ofrece e beneficio mas grandi pa salud y lonjevidad.
Actividad aerobico tambe a mustra beneficio importante. Personanan cu tabata haci mas cu 7.5 ora di actividad aerobico pa siman a mustra un riesgo di morto entre 26% y 43% mas abou compara cu esnan cu no tabata activo.
Un otro descubrimento interesante tabata cu e beneficio di entrenamento di forsa no a sigui aumentando despues di aproximadamente 120 minuut pa siman. E investigadornan no a observa beneficio adicional significativo ora e cantidad di entrenamento a pasa e punto ey.
Pa conduci e investigacion, cientificonan a analiza informacion colecta durante tres decada for di tres estudio grandi. Den total, 147.374 persona a participa, y e mayoria tabata muhernan cu un edad promedio di 54 aña na e inicio di e estudio.
Cada dos aña, e participante nan tabata reporta cuanto tempo nan dedicaba na actividad fisico durante un siman normal.
E estudio a revela cu casi tres cuart parti di e participante nan no tabata cumpli cu e cantidad recomendabel di actividad aerobico. Na mes momento, casi mitar di nan si tabata haci algun forma di entrenamento di forsa.
Personanan cu tabata train pa forsa generalmente tabata mas hoben, cu un peso corporal mas abou, haci mas actividad aerobico y mantene un estilo di bida mas saludabel compara cu esnan cu no tabata haci entrenamento di forsa.
E riesgo di morto mas abou a wordo observa den personanan cu tabata combina un nivel halto di actividad aerobico cu entre 60 y 120 minuut di entrenamento di forsa pa siman.
Investigadornan a enfatisa cu, pasobra e estudio ta basa riba informacion reporta pa e participante nan mes, nan no por confirma completamente cu entrenamento di forsa ta e causa directo di e resultado nan. Sin embargo, e evidencia ta indica claramente cu entrenamento di forsa ta un parti importante di un estilo di bida saludabel y por contribui na un bida mas largo.
Actualmente, e recomendacion general pa hende grandi ta pa haci regularmente actividad aerobico y por lo menos dos sesion di entrenamento di forsa pa siman pa mantene un nivel optimo di salud.
E estudio ta traha riba añanan di investigacion anterior cu ta mustra e beneficionan di tanto ehercicio aerobico como entrenamento di forsa pa salud, y guia di e U.S. Centers for Disease Control and Prevention.
E CDC ta bisa cu adultonan Americano mester di 150 minuut di ehercicio aerobico y dos dia di entrenamento di forsa pa siman pa keda den un salud optimal.