Diadomingo mainta na Wilhelmina Park, durante e ceremonia di conmemoracion di 198 aña di independencia di Peru, Prome Minister Evelyn Wever-Croes a dirigi su discurso enfatisando cu e paz y union cu ta existi entre Aruba y e comunidad Peruano ta haci nos mas fuerte pa logra pasa den tur reto di nos pais y logra mas pa fortalece nos economia.
“Ta un gran honor pa ta aki riba invitacion di Fundación Fiestas Patrias en Aruba, pa den nomber di Aruba y di Gobierno di Aruba, celebra cu boso e fecha importante aki di e 198 aniversario di independencia di Peru manera cu boso tambe ta celebra hunto cu nos nos celebracionnan nacional”, Prome Minister a cuminsa bisa den su discurso.
Na Aruba tin 1528 peruano ta biba cu awe ta di fiesta hunto cu tur peruano rond mundo. No solamente nan ta celebra independencia di nan pais, sino mas ainda e hecho cu husticia, desaroyo economico, cultura y tradicion a prevalece durante 198 aña di independencia, apesar di diferente reto politico na Peru.
Pa un tempo cortico na Aruba, a observa un desaroyo economico avansa y positivo. Como consecuencia di esaki, mester a atrae trahadonan di otro pais pa satisface e demanda di tur sector economico di nos pais. E personanan aki, inluyendo e comunidad Peruano, a bandona nan pais, famia y a contribui grandemente na mehora e desaroyo economico, social y cultural, y e bienestar general di nos pais. Pa esaki, Prome Minister den nomber di pueblo di Aruba, a expresa cu nos pais lo ta semper gradici.
E comunidad Peruano na Aruba ta instala aki desde mas di 50 aña teniendo tambe un Oficina Consular y poblacion minimo. Peruanonan ta caracterisa pa nan trabou duro y comercio, engrandeciendo Aruba cu nan esfuerso y integracion cultural, religioso y actonan festivo.
“Nos reconocimento ta bay na boso tur cu a haci di Aruba boso hogar, specialmente un di e pioneroneronan di diplomacia peruano na Aruba, señor Hugo Lampl Klein y boso Fundacionnan instala na nos pais, hunto ta halsa e imagen nacional di Peru. Peruanonan cu a imigra pa bin Aruba, ta personanan trahado, humilde y honesto. Como ser humano, nan a demostra di tin cualidadnan cu ta fundamental pa e existencia socio-economico di nos pais. Awe, e lasonan entre Peru y Aruba ta estrechando mas y mas. E gran estadista y libertador di nos pais, señor Betico Croes (dfm) a bisa cu un Arubiano no solamente ta un cu a nace na Aruba, sino un cu a haci di Aruba su hogar”.
Prome Minister a tuma e oportunidad pa gradici Fundación Fiestas Patrias del Perú en Aruba, kendenan na april a ricibi nos pensionadonan di OPPA pa nan destino pa Cuzco. Na Aeropuerto Jorge Chávez, nos pensionadonan a wordo ricibi door di Polis Turistico, baile tipico y Ministerio de Turismo y Prom Perú, cu un coordinacion excelente di Ministerio di Cultura di Aruba y funcionarionan di Departamento di Cultura Aruba.
“Semper nos mester corda cu paz, integridad, y cooperacion, ta elementonan sumamente necesario pa logra felicidad y e progreso di nos pueblonan. Ademas nan ta importante pa nos enfrenta e problemanan y retonan en comun den un tempo di crisis financiero, politico y economico den e region. Awe cu nos ta celebra e fecha di independencia di Peru, cu Peruanonan cu ta biba aki y cu esnan cu ta di bishita, den nomber di Gobierno di Aruba y di pueblo di Aruba, mi ta felicita e Gobierno Peruano y e pueblo Peruano, deseando cu e virtud y e spirito di solidaridad di e pueblo Peruano keda conserva pa semper”, Prome Minister Evelyn Wever-Croes a expresa den su discurso na e ceremonia di conmemoracion di 198 aña di independencia di Peru.