Oranjestad, 4 april 2025 – Na final di un siman yena cu trabou preparatorio importante y necesario, como tambe atende cu diferente reunionnan, Gabinete AVP-Futuro ta clausura e prome siman di gabinete cu e desvelo oficial di e Plan di Gobernacion 2025-2028 pa pueblo di Aruba.
Den un evento ameno diabierna anochi, Prome Minister, mr. Mike Eman a introduci e Gabinete AVP-Futuro y e Plan di Gobernacion 2025-2028 na Aruba completo. Vice-Prome Minister, mr. Gerlien Croes tambe a dedica algun palabra inspirativo y iluminante pa kico pueblo por spera den e futuro cercano di parti di Gabinete AVP-Futuro. “Cada ciudadano por ta contento di wak progreso y oportunidad di yega cerca di nan, esey t’e unico meta cu nos como gabinete tin” mr. Gerlien Croes a remarca.
E mensahe ta cla, cu e sosten ta fuerte pa logra tur Gabinete AVP-Futuro su metanan! Cu confiansa y curashi, Gabinete AVP-Futuro lo tuma e pasonan necesario pa trece mehoracion structural y alivio cu e pueblo Arubiano tanto ta anhela. “Ora un gobierno ta busca inspiracion, ta busca un caminda, no tin un miho caminda pa para unda historia ta skirbi pa ta e difrencia pa un y tur den nos comunidad” Prome Minister Mike Eman a declara.
Awo ta ora di lora manga y traha, pa promove e bienestar general, e bon comun, y un miho futuro pa nos tur.
