Caminda di Meiveld pa rotonde Dadelstraat y bocht di Seroe Patrishi a cera ambos caminda, lo ta bay ta cera pa un temporada basta largo.
Meiveld, Seroe Patrishi: Dialuna mainta lo por bay spera un chaos den trafico pa esnan cu tin cu bay Oranjestad via Meiveld y tambe pa esnan cu tin cu tuma e caminda di Seroe Patrishi pa bay Oranjestad.
Un observacion, ta cera tur e camindanan aki pero ainda no por ni caba cu Wathey Vos Boulevard, e motibo pakiko no ta traha structura, caba cu un parti y sigui cu un otro, no ta na nos conocimento, esey sigur expertonan lo por sa e motibo.
Un cos ta sigur, cu e camindanan aki lo ta bay duna e chauffeurnan hopi dolor di cabes pa basta luna, especialemente e chauffeurnan cu tin cu sali tur mainta bay Oranjestad, hiba mucha scol y of bay trabou.
Normalmente cu e camindanan ta habri mes, tur dia tin filanan largo den oranan di mainta y atardi. Awo ta cera e camindanan aki y sin pone un opcion mas cerca. Si tuma rotonde Paradera bay direccion di Oranjestad bo mester desvia bay te Tanki leendert, dje drenta Seroe Blanco pa bay Oranjestad.
Esaki sigur ta bay pone hopi mas pression den e trafico chaotico especialmente na e rotonde di Tanki Leendert y rotonde Codemsa, tambe e camindanan paden lo ta bay ta hopi mas trafica, un chaos total lo por spera entrante dialuna.
E desviacion pa yega Oranjestad ta demasiado largo y no lubida cu ta bay gasta mas gasolin pa yega Oranjestad.
Berdad e ringweg lo por bay keda bunita, pero e temporada cu e camindanan aki lo keda cera lo trece hopi stress den e trafico.
Tur cos ta posibel ta e boluntad mester tey, nos ta spera cu pronto DOW bin cu un caminda alternativo mas cerca, pa e trafico por yega Oranjestad mas liher sin tanto buelta den Seroe Patrishi, Tanki Leendert y Seroe Blanco.
Tur chauffeur corda cu desde Dialuna mester sali mas tempran for di cas, pa asina evita mas stress den trafico, si bo ta bin di pavia bo mester pasa via rotonde Cumana cu sigur trafico lo pega eynan. Si bo ta bin di Paradera no bay na e rotonde zuid pero tuma rutanan alternativa di shiribana, Tanki Leendert, Seroe Blanco of rotonde Tanki Leendert bay zuid.