Minister Chris Romero a ricibi Diputado Hubert Martis di Boneiro pa intercambia punto di bista riba e proyecto di Fast Ferry. Señor Hubert Martis ta Diputado di Finanzas y Economia na Boneiro.
Diputado Martis a expresa su satisfaccion cu Minister Romero a rebiba e proyecto cu ta conecta e tres islanan ruman, esta Aruba, Boneiro y Corsou. El a indica cu Boneiro, mescos cu Aruba y Corsou, ta wak e beneficionan economico pa su Pais.
Minister Romero a splica e trayecto cu e la encamina caba pa cu e proyecto di Fast Ferry, door di informa su mes debidamente, papia cu stakeholders na Aruba y busca aprobacion di Conseho di Minister y Parlamento na Aruba. Tambe e titular di e cartera di Transporte a informa Diputado Martis di e bishita cu e efectua na Corsou pa reuni cu e Gobierno di e isla aki, y asina e siguiente paso lo ta pa firma un MoU entre e dos Gobiernonan.
Diputado Martis a indica cu na Boneiro tambe e interes t’ey pa cu e proyecto di Fast Ferry. E ta premira cu actividad comercial lo subi y tambe cu mas hende lo bay bishita e islanan ABC. Sr. Hubert Martis a indica cu na Boneiro ta sondeando caba diferente localidad pa ubica e ‘pier’ pa e Fast Ferry.
Ambos Mandatario a gradici otro pa e encuentro y e informacion comparti. A palabra cu lo tin “follow up” pa asina formalisa e trahamento hunto riba e proyecto di e Fast Ferry.
