Recientemente, y na caminda pa un solucion duradero pa awa agrícola, WEB NV a presenta y entrega e prome raport titula ‘Agricultural Water Roadmap’.
Dicho raport ta ilustra e dos fluho grandi di awa na Aruba. Uno ta awa di yobida y e otro ta awa di laman.
Pa perspectiva di plantacion, awa di yobida ta cubri 86% di e fluho di awa pa agricultura. E awa aki ta cay directo riba un plantacion of por yega indirecto na e plantacion. E awa di laman ta wordo uza door di WEB pa produci awa potabel, esta awa di bebe pa nos comunidad.
Un di e retonan nos dilanti awor ta pa colecta e awa di yobida, pone esaki den un reserva pa e wordo uza despues. E otro reto ta pa transporta e awa recolecta na un forma mas eficiente y barata posibel.
Tin seis pilar pa traha riba dje pa e solucion duradero ta na su lugar.
1. Maneho y Regulacion,
2. Modelo Integral di Agricultura,
3. Modelo di ‘Waterstreams’,
4. Certificacion, Siguridad di Calidad y Control,
5. Concientisacion Nacional,
6. Conocemento, Maneho y Inovacion.
E ‘Agricultural Water Roadmap’ ta resultado di dos dia intensivo di trabou. Tanto representantenan di Ministerio di Sector Primario y WEB a participa, pero tambe directiva di UFA (United Farmers Association) y directiva di Santa Rosa.
Durante formulacion di e ‘roadmap’ lo bin cu solucionnan riba termino cortico, mediano y largo. Na caminda solucionnan ta wordo implementa di biaha. Un di e condicionnan mas importante ta pa crea conciencia publico pa cu importancia di cuminda organico y saludabel.
Minister Romero a expresa su satisfaccion pa cu e trabou desplega door di WEB, UFA y su propio Ministerio, pa yega na e documento aki. El a indica cu agricultura ta bay drenta nos scolnan como materia riba diferente nivel.