ORANJESTAD – Parlamentario Setty Christiaans-Yarzagaray a atende e prome reunion di plataforma amplio cu Centraal Bureau Statistiek (CBS) a organisa preparando pa Censo 2020. Mirando e importancia di innovacion den departamentonan di gobierno, e ekipo di innovacion di Gobierno a acerca CBS tambe pa asisti den e proyecto aki. Segun e Parlamentario, un proyecto manera Censo tambe ta den linea cu e proyecto di e Metanan di Desaroyonan Sostenibel di Nacionnan Uni (SDGs).
E Parlamentario en cuestion a traha pa hopi aña na e departamento di CBS y ta bin di e mundo di dato por lo tanto e sa cu un Censo ta un di e proyectonan mas grandi y importante di un pais desaroya riba nivel di data. Cu un Censo por colecta dato riba un nivel varia y total di un pais pa asina contribui na duna direccion na e pais por medio di maneho. Cada 10 aña paisnan desaroya ta wordo exigi pa ehecuta un Censo y na 2020 Aruba ta haya e oportunidad unico pa haci cierto preguntanan pa asina colecta data necesario riba diferente area.
Mirando e hecho cu Aruba ta completamente involvi cu e programa di Metanan di Desaroyonan Sostenibel di Nacionnan Uni, SDGs, ta momento pa tin e datanan necesario pa midi y monitoria segun un set di indicadornan. Indicadornan di SDGs no ta wordo determina pa Aruba y progreso di logra e metanan no ta wordo determina pa Aruba den sentido cu ta Nacionnan Uni a stipula nan lista di “indicators” y “targets”. Si falta informacion pa midi of monitoria cierto meta, Aruba lo por pa medio di un Censo, haci cierto preguntanan pa yega na e indicadornan aki, e Parlamenatario ta duna di conoce.
Den opinion di e Parlamentrio, tur Censo ta importante pa un pais pero Censo 2020 ta mas importante mirando e hecho cu Aruba tambe a firma e acuerdo pa logra e Metanan di Desaroyo Sostenibel (SDGs) di Nacionnan Uni y pa e Parlamentario ta importante tambe pa sigura cu e plataforma di hende of instancianan cu ta contribui na e preguntanan di Censo 2020 tambe ta riba e nivel of tin e conocemento di e programa di Metanan di Desaroyonan Sostenibel, SDGs, pa asina contribui cu e preguntanan necesario.
E Parlamentario a tuma nota cu durante e reunion aki CBS a parti sesionnan pa trata e cuestionario di Censo 2020 den 4 diferente area, cu ta:
- Poblacion, Desaroyo y Salud. 2. Educacion. 3. Actividad Economico, Empleo y Entrada. 4. Vivienda, Condicionnan di Bida y Innovacion.
Faltando ainda 2 aña pa Censo 2020, planificacionnan ya caba a cuminsa for di aña pasa. Basa riba cuestionario existente, CBS ta trahando riba e preguntanan pa determina kico ta bay wordo uza pero tambe ki pregunta ta necesario y relevante pa bin acerca. Innovacion y technologia tambe tin un papel importante den esaki. E Parlamentario ta bisa cu mundo ta sigui draai y ta sigui avansa por lo tanto mester pensa preguntanan pa futuro tambe. Un ehempel cu e Parlamentario a duna ta cu den e Censonan di pasado no tawata puntra cuanto celular cada persona tin pasobra casi no tawata existi celular 20 aña pasa. Awendia preguntanan di telecomunicacion y technologia ta hopi importante manteniendo semper pregunta riba e hende central naturalmente. Mirando cu Gobierno mester stipula maneho riba diferente tereno, tin mester di datonan den tur e areanan aki.
Christiaans-Yarzagaray a comparti su propio experiencia bisando cu tin paisnan cu practicamente den un Censo no mester haci hopi preguntanan (Merca por ehempel) pasobra nan sistema administrativo ta bon hinca den otro cu riba su mes ta resulta den informacion. Na Aruba ainda ta necesario colecta informacionnan necesario pa maneho durante un Censo. Pa esaki ta rekeri un cuestionario mas largo y amplio pa colecta tur dato relevante.
“Como Parlamentario biniendo for di e mundo di data, mi ta urgi Gobierno di Aruba pa establece sistemanan innovativo cu por colecta datonan durante e progreso di trabou na unda cu esaki ta permiti. Esaki lo haci e trabounan di colecta dato mas facil y lihe. Y un otro beneficio ta cu Gobierno lo no tin mester di inverti mes hopi placa mas den proyecto asina grandi manera Censo of cualkier otro investigacion pa colecta data.
Parlamentarionan ta dispuesto pa aporta cu conocemento na introduccion di un sistema asina. Tambe dispuesto pa aporta na e proyecto di Censo 2020, pa cua motibo tambe a asisti na e reunion di CBS pa obtene e informacion necesario. Pueblo di Aruba por ta prepara pa un Censo aki 2 aña unda cu sigur lo nota diferencia compara cu Censonan anterior na e forma pa colecta datonan necesario pa haci e trabou mas eficiente y efectivo,” segun Parlamentario Christiaans-Yarzagaray.