Kralendijk – Durante su bishita na Boneiro dia 19 di juni Colegio di supervision financiero di Boneiro, Sint Eustatius y Saba (Cft) a expresa su preocupacion na Colegio Ehecutivo y Conseho Insular. Cft ta constata cu Boneiro riba demasiado tereno no ta cumpli cu e normanan di e Ley di finansa di e entidadnan publico Boneiro, Sint Eustatius y Saba (Wet FinBES). ”Mester di mas forsa directivo pa logra resultado visibel”, segun presidente di Cft Raymond Gradus.
Durante su bishita Colegio a hiba combersacion cu Gezaghebber, Colegio Ehecutivo y Conseho Insular. Tambe durante un bishita di trabou na Water- en Energiebedrijf Bonaire (WEB) a papia tocante e structura di tarifa nobo y e necesidad di inverti den e produccion di electricidad.
Cu Colegio Ehecutivo a delibera extensamente tocante e forsa directivo necesario pa implementa mehoracion riba tereno di e ciclo di presupuesto y hustificacion y e maneho financiero. A pesar di varios plan Cft ta constata un progreso demasiado limita di e mehoracion necesario di e maneho financiero. Na 2017 a finalisa varios plan cu recomendacion, pero te ainda mester implementa nan. Cft a conseha pa fortifica e organisacion gubernamental. Pa basta tempo caba Cft ta pidi atencion pa yena e diferente funcionnan clave denter di e organisacion y a discuti profundamente tocante esey cu Colegio Ehecutivo.
Durante e bishita di Cft tambe a papia tocante e hustificacion di 2017 y 2018. Cft a expresa su decepcion cu no ta entrega e reportahenan trimestral na tempo. Tambe a expresa preocupacion pa e echo cu, mescos cu aña pasa, Conseho Insular lo no aproba e cuenta anual na tempo, esta pa mas tarda dia 15 di juli. Cft a exhorta Boneiro pa haci su esfuerso maximo pa mas pronto posibel elabora e cuenta anual di 2017 y seguidamente aprob’e.
E desaroyonan na varios empresa publico ta preocupante. Colegio a pidi atencion pa esaki, pa preveni cu e desaroyonan aki lo influencia e presupuesto di Boneiro negativamente. E promesa di Colegio Ehecutivo pa laga efectua control operacional (operational audits) na e empresanan publico a haya retraso. Tambe entrega na tempo di e cuentanan anual di e entidadnan publico y aplicacion di e codigo di bon gobernacion ta di esencial importancia pa mantene un vision respecto e nombramento di personal completo den, entre otro, e huntanan di comisario y pa por haci un calculacion di riesgo apropia.
Ultimo bishita di miembro di Cft Sybilla Dekker
Entrante dia 1e. di juli e di dos periodo di Sybilla Dekker como miembro di Cft BES riba proposicion di Hulanda ta yega na su final. Semper e tabata masha comprometi cu e desaroyonan administrativo y economico di Boneiro. “Mi ta mira atras na un colaboracion special cu Colegio Ehecutivo y Conseho Insular di Boneiro”, segun Sybilla Dekker. Entrante dia 1e. di juli 2018 Cft BES ta consisti di presidente Raymond Gradus, miembro riba proposicion di BES Herbert Domacassé y miembro riba proposicion di Hulanda Henk Kamp.