Durante un entrevista na Hulanda diabierna prome di juni, Secretario di Estado Raymond Knops, a expresa cu relacion cu Premier Evelyn Wever-Croes ta excelente. Segun señor Knops, Prome Minister a recupera algo di e confiansa perdi bek di Hulanda den Aruba.
E diabierna ey, Prome Minister di Aruba a atende Rijksministerraad na unda a trata e situacion financiero di Aruba y e plan cu Gobierno di Aruba tin pa yega un surplus. Despues di e reunion, señor Raymond Knops publicamente pa medio di un entrevista a duna su opinion positivo di e relacion.
Señor Knops ta na haltura cu e situacion financiero di Aruba ta hopi malo a causa di ocho aña di un maneho iresponsabel di e Gobierno di AVP.
Knops a duna di conoce cu e cooperacion cu Prome Minister Evelyn Wever-Croes ta excelente. El a expresa cu e ta sinti cu awo si Aruba tin un Gobierno cu ta comprende cu mester reduci e debe creciente.
Knops ta haya importante tambe cu Gabinete Wever-Croes a cuminsa corta gasto den e aparato gubernamental. Esaki, despues di tur conseho di CAFT, Gobierno di AVP no a haci.
Despues di su prome bishita na Hulanda, Prome Minister a keda hopi satisfecho cu señor Raymond Knops y Hulanda ta hayando confiansa bek den nos pais. E mal maneho di Gobierno di AVP a causa un desconfiansa grandi den Hulanda. Pero e mesun palabranan di señor Raymond Knops ta cu e relacion cu Prome Minister Evelyn Wever-Croes ta excelente. Esaki ta indica cu Hulanda ta hayando confiansa bek den Gobierno di Aruba despues di e disaster cu e Gobierno anterior a haci.