Parlamentario Endy Croes ta bolbe accentua di no lo laga ningun expresion di “chambon” haci pa partido AVP pasa y lo sa di reacciona mesora riba nan. Mike De Meza kende tin alrededor 150 dia sin presenta na trabao y t’ey parcialmente solamente ora cu tin reunion publico a haya ta bon di ataca Coalicion y Parlamentarionan den su ultimo declaracion. Manipula mente di hende y “horta” pais Aruba ta e lema di AVP y esey ta e preparacion cu nan ta ricibi for di Henny y Mike Eman.
Cobra sin traha
Mike De Meza ta tilda Parlamentarionan di Coalicion cu nan no tabata critico durante tratamento di e presupuesto. Bueno, Coalicion a haci mas di 1200 pregunta por escrito, cual siguramente ta hopi mas cu AVP a haci. Es mas, dia 24 di April momento cu mester a vota pa aproba of desaproba presupuesto 2018, Mike De Meza mes no a presenta na trabao y NO tabata den sala. Presidente di Parlamento a notifica publicamente cu Mike De Meza ta den celebracion di un bruid cual fiesta muy probablemente a wordo paga cu placa ilicito hereda di pais Aruba. Pues net Mike De Meza cu no tabata presente tin curashi pa critica tur cu si tabata na pia di trabao? “Er zijn mensen en er zijn potloden”.
Eliminacion di BBO?
Otro aspecto ta e momento cu Mike De Meza a declara cu “BBO y BAZV lo bay subi cu 6%”. Esaki ta claramente e manera cu nan ta manipula. E berdad ta como lo siguiente. MEP durante su gobernacion di 2001 pa 2009 a ricibi conseho di profesionalnan riba e tema aki pa haci ahustenan mescos tur pais rond mundo y bay over di impuesto directo pa impuesto indirecto cual ta garantisa aporte di tur ciudadano y gobierno lo haya su fair share mesora. Asina a introduci 3% di BBO. AVP hunto cu Mike Eman y Mike De Meza a bagatalisa esaki hibando un campaña cu AVP mesora lo “ELIMINA” BBO. Ganando e confiansa di pueblo Mike & Mike a dal pueblo e promer dax den wowo door cu nunca a “ELIMINA BBO” manera nan a priminti.
Masacre den finansa publico
Mike De Meza ta un ingeniero den “water treatment” pa cu refineria, pues un persona cu cero of “nul” conocemento of experencia den Finansas Publico y sin ningun preparacion pa esaki a bira minister di Finansas pa e periodo di October 2009-Oct 2013. Den reunion di parlamento te cu awe tin graba con Mike De Meza como minister di Finansas di pais Aruba a ekiboca su mes na un forma mahos entre “assets y income” cual a duna Mike De Meza e tempo aya e status di “Lolo di Awa”. Mike a bay hues contra Solo di Pueblo y a perde su caso. “Lolo di awa” na hulandes ta un “Water lulletje” cu ta un tipo di pisca y no ta ofensivo. Na 2008 debe nacional di pais Aruba tabata 41.7% di GDP esta 41.7 cen di cada florin ta compromete pa paga debe. Bou maneho di hustamente Mike De Meza esaki a alcansa riba 70% na 2013 y a yega 93% na 2018. Mike y AVP despues di a manipula y engaña pueblo cu lo “ELIMINA” BBO a bay over na reduci BBO na 1.5% pa un tempo masha cortico. Despues Mike De Meza y AVP a dal pueblo un cuchiu den lomba introduciendo 2% di BAZV durante un reunion publico sin ningun estudio y ta manda e BBO/BAZV na 3.5%. Esaki ta e puro berdad. Coalicion cu a drenta hereda e desaster financiero nunca bisto, nunca por a imagina ni tampoco anticipa cu e desaster ta di e magnitud aki.
Mentiroso patalogico
Aruba ta mara na man cu pia cu PPP projecten unda mester bay paga 20 aña largo 80.5 MIYON pa aña. Un placa cu no ta presupuesta ningun caminda. Debe Nacional den 8 aña di AVP a redobla di 2.1 BIYON na 2009 pa 4.2 BIYON den 2017. Pago na solamente interes di pais Aruba a mas cu redobla di 100 MIYON na 2009 pa 216 MIYON na 2017. Pues na interes so Aruba ta pagando 600 mil florin pa dia riba placanan presta. Pues ta imposibel compronde un persona “non grata” manera Mike De Meza kier sigui gaña pueblo cu BBO y BAZV ta bay subi cu 6%. E ta actualmente 3.5% hereda for di AVP y lo bay agrega un crisis heffing di 2.5% y hunto e lo alcansa 6%. Pues bay subi cu 6% (segun Mike De Meza y AVP) y lo bay alcansa 6% ta dos expresion completamente diferente. Esaki ta e realidad. E Coalicion actual lo agrega un “crisis heffing” temporal di 2.5% cual ta wordo reparti den 1.5% pa paga proyectonan di PPP di AVP y 1% cu lo bay na BAZV pa cubri gastonan abnormal halto di AZV cual lo wordo revisa profundamente y corigi pronto. Mike De Meza kier hunga santo awe gritando manera un alma desespera cu MEP ta partido di medida. E 2% di BAZV cu Mike De Meza y AVP a claba pueblo no ta medida?
Mas medidanan cruel di AVP
Mike De Meza, Mike Eman y AVP a hisa benta y subi edad di pensioen di 60 pa 65 aña den un solo tiro sin piedad kibrando speransa di un gran cantidad den pueblo. Esaki tampoco ta medida? Mike De Meza a tuma decision pa hedge fuel oil di WEB na 90 dollar pa bari cual prijs mundialmente a cay despues te na 30 dollar pa bari y pueblo mester a keda paga pa e prijs caro cu a costa Aruba rond 300 miyon florin. Mike De Meza cu Mike Eman a duna ordo pa riot comando bati pueblo 1 di october 2014 momento cu pueblo a bay protesta pa motibo cu prijs di awa a aumenta. Esaki ta prohibi pa lubida. Esaki ta e bon gobernacion di Mike De Meza. Den un proximo articulo nos lo recorda Mike De Meza mas di 20 medida cu AVP a tuma contra e pueblo aki apart di a horta tereno, corupcion cu permiso, ladronicia di siglo cu hedging y mucho mas. P’esey pueblo a bira lomba pa AVP mandando AVP atras cu 10 mil voto y ainda Mike kier purba hunga su politica anticua. Pues laga esaki ta un advertencia cu ki ora esnan cu a causa e desaster na e pais aki habri nan boca y trata na manipula pueblo por conta cu nos lo “fire back” cu e berdad.
