Home » Parlamentario Richard Arends: Pueblo ta bay sinti efecto di aumento substancial di accijns riba combustibel den lunanan nos dilanti

Parlamentario Richard Arends: Pueblo ta bay sinti efecto di aumento substancial di accijns riba combustibel den lunanan nos dilanti

by Admin
0 comment 91 views

 

 

E efecto di aumento di accijns riba gasolin lo bay tin un efecto hopi grandi riba gastonan di empresanan y poder di compra di tur ciudadano, principalmente esunnan cu entrada mas abou. Gobierno ta premira 10 miyon di florin na entrada pa e aña aki a base di aumento di accijns riba combustibel. Algun luna atras a aumenta accijns cu 2 cen, pero pa logra e entradanan presupuesta, Gobierno lo mester aumenta accijns riba combustibel cu mas di 12 cen e aña aki ainda. Esaki ta birando un preocupacion grandi den comunidad ya cu dentro di algun siman gobierno ta pone en efecto resto di su pakete di medida caminda lo bay over na aplica e asina yama  ‘crisisheffing’ cu ta consisti di 1% di BAZV y 1.5% di BBO. Mientras cu e gabinete actual ta defende esaki pa cubri gastonan di maneho bieu, tur cos ta mustra cu e ‘coalitieheffing’ aki ta pa paga maneho nobo.

Parlamentario Richard Arends di fraccion di AVP ta mustra cu for di momento cu gobierno a anuncia su decision cu e lo aumenta BBO, BAZV y accijns riba gasolin, por a spera cu esaki lo bay tin su efecto negativo riba gastonan den diferente cas rond Aruba.

 

Sr Arends a mustra cu gobierno no a tuma ningun precaucion pa evita loke a pasa na  2007 caminda na momento cu gobierno di MEP a introduci BBO caminda e medida aki transforma su mes den un medida acumulativo. Despues di un aña por a conta cu un tasa di inflacion di riba 10%.  Dentro di algun siman esaki lo no ta diferente: un crecemento economico abou, prijsnan di combustibel aumentando y aumento di BBO y BAZV lo ocasiona un aumento di prijs considerablemente afectando grandemente e poder adkisitivo di famianan como tambe e gastonan di operacion di empresanan local. “Despues di dies aña pueblo di Aruba lo ta experenciando un perfect storm atrobe,” Sr. Arends a ilustra. Den un cadena di tres ‘schakel’, un aumento di BBO y BAZV cu 2.5%, obviamente ta resulta den un porcentahe hopi mas halto. Den algun caso por papia di un aumento di casi 8% .Un producto na momento cu e ta wordo importa na un prijs, despues di pasa tres schakel y na momento cu e yega na e consumidor,  e lo ta 8% mas caro. “Esaki ta sin conta e efecto speculativo cu lo tin bira cierto productonan, manera comestibel,” e la sigui splica.

 

Pa mitiga e efectonan di e aumento di BBO, BAZV y accijns, Gobierno a priminti un reduccion riba e prima di AZV p’e pensionadonan, aumento di reparatietoeslag cu 25 florin y mas incentivonan fiscal. E pakete di compensacion manera anuncia, ta yega na sumanan cuantioso y lo tin un repercusion basta serio pa finansas publico, asina Parlamentario Arends ta señala. No a tene cuenta cu esaki ni den presupuesto 2018, pero tampoco den cuadro financiero p’e añanan cu ta bin. “Aunke cu e pronosticonan di Banco Central publica un dia despues cu e presupuesto a wordo aproba ta coincidi cu esun cu Gobierno a usa den e cuadro financiero, esaki no ta inclui e efecto di e “crisisheffing” como tampoco e pakete di compensacion. Esaki ta nifica cu probablemente e crecemento economico lo ta mas bou cu Gobierno ta pronostica y lo conduci na menos entrada. Como concecuencia di esaki e deficit lo ta mas halto cu -3.0%”

 

Pues por conta sigur un aumento di prijs, un perdida di poder di compra pa nos ciudadanonan sigur den e prome lunanan despues cu dia prome di juli esaki drenta na vigor,” Parlamentario Richard Arends ta mustra. Dia pa dia ta bira mas cuestionabel si Gobierno lo introduci e pakete di compensacion ainda, mirando cu lo no por desvia di e norma nobo di -3,0% acorda cu CAFT.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio