E MANEHO NOBO DI E GOBIERNO ACTUAL HUNTO CU NOS PROFESIONALNAN A PONE ARUBA RECOBRA CONFIANSA DI FITCH
Ta e Gobierno anterior a daña credibilidad financiero di pais Aruba
ORANJESTAD – Segun Minister Xiomara Ruiz-Maduro awe opositornan kier bagatalisa e trabou cu nos Gobierno a haci hunto cu hopi profesional y tur esnan cu a papia cu Fitch den e ronda di evaluacion tras di lomba.
E mandatario a sigui accentua cu hopi hende no sa y p’esey ta bon pa recorda cu e Gobierno di AVP cu nan mal maneho a percura pa nos pais perde hopi crediblidad financiero y cu prueba den man a mustra un grafico pa tur esnan den Parlamento por a mira y realisa esaki tambe.
Ademas Minister di Finanzas a declara cu ta bon pa e menciona e berdad aki tambe, esta cu Gabinete Wever-Croes no a paga 300 mil dollar na un compania pa yuda Gobierno aki cu rating. Segun e mandatario actual ta esey e Gobierno anterior a haci ora nan a spanta di mira kico nan a haci cu e credibilidad financiero di nos pais.
Gobierno anterior di AVP a kere cu Fitch y S&P nan evaluacion tabata wega, pero ni pagando e placa aki no a yuda pa drecha e rating cu e Gobierno di AVP mes a daña.
Minister Ruiz-Maduro ta bisa cu esnan di e Gobierno anterior no mester ni cuestiona mes y pio bin bisa cu Fitch no tin confiansa den Gabinete Wever Croes. Ta un notch riba junk bonds e Gobierno di AVP a laga nos, y ta danki na nos sinceridad y curashi pa atende e retonan di e Pais aki, nos a keda cu nos status di inversion cerca Fitch.
Aki poco dia S&P tambe lo duna su rating pa Aruba y e Gobierno actual ta spera cu cerca nan tambe Aruba por recobra e confiansa y cu n’e nos recobra nos credibilidad financiero.