ORANJESTAD – Gobierno di Aruba a opta pa introduci e aspecto di dokter di confianza (vertrouwensarts) den fase dos di e crisis plan anuncia. Parlamentario Sue-Ann Ras sinembargo durante su disertacion diahuebs den Parlamento, durante tratamento di presupuesto, a mustra cu e aspecto ey no por warda. A presenta te hasta un mocion, unda cu Ras ta urgi Gobierno pa inclui e dokter di confiansa den e fase 1 y mester haya su atencion di biaha, pa niun famia, mucho menos mucha, ripiti e storia tragico di e 2 angelitonan, ya cu tin 100 famia registra, cu tambe ta cay den e codigo di linea cora di risico.
GRITO PA AUMENTO
Segun Ras, aunke e ta mira con algun parlamentario ta sali grita y cuestiona tocante e aumento di presupuesto di minister di asuntonan social y labor, nan ta lubida cu door di nan propio crisis di actitud y seriedad di duna contenido na nan lema di: ‘un miho calidad di bida’, a opta pa sigui nan lider ciegamente den su aventuranan descabeya.
REALIDAD DRASTICO
Awendia nos ta confronta cu e drastico realidad di crisis social, bon scondi den lachi, mescos cu e cuantioso proyectonan bunita skirbi di e ministerio aki. “Y analizando tur e datonan cu nos a haya for di diferente instancia social, mi ta keda enfatisa cu mester inverti y duna tur atencion necesario na henter e ministerio di asuntonan social” Ras a sigui bisa.
FIESTA vs VIOLENCIA
E parlamentario a mustra cu loke ta alarmante ta, cu den transcurso di 4 aña, mientras e ex mandatario tabata biaha y fiesta, mas di 400 hende muhe a acudi na Fundacion Hende Muhe Den Dificultad pa maltrato/violencia domestico. “Agrega riba esey, mas di 70 hende muhe compaña pa nan yiunan mester a haya shelter, paso nan tabata den peliger cu nan bida y mayoria ta bin di un famia casa y di Aruba” e parlamentario a sigui bisa. Den 4 aña, un averahe di 300 caso di abuso di mucha a drenta via hospital y ta registra.
MUCHO MELDING
Pero segun Ras, e crisis social no ta stop eynan. El a mustra durante su disertacion, cu den 4 aña, tin un promedio di 900 melding, cu a drenta na Bureau Sostenemi y e ex minister y henter su gobierno a opta pa no duna mas subsidio y apoyo na dicho fundacion y hopi fundacion mas.
Y finalmente e logro den 4 aña ta yega na un sinfin di diferente caso social na Departamento di Asuntonan Social, unda cu dado momento, e departamento no tabata sa mes mas con pa sigui funciona y con pa ataca y atende tur e problemanan cu tabata presenta na nan porta riba un base diario. E ex minister den 4 aña a bishita e departamento solamente 1 biaha y a dicidi di pone un stop na personal profesional y pone su discipelnan y kita subsidio di nan, pa hinca den otro post di fiesta, pa p.e. e famoso apertura di brug.
PROBLEMA SOCIAL
E problemanan social no ta algo cu a bin den e 4 lunanan aki, ni sikiera den e ultimo aña. “Mas bien ta un acumulacion di hopi aña di negligencia, falta di atencion y seriedad, falta di vision y bon maneho structura den tur e departamentonan social y fundacion pa pone e ser humano central. Gobierno ta refleha e alma di su pueblo. Pero a opta pa fomenta e actitud y mentalidad di ‘no ta worry cu nada y no ta importa loke pasa cu otro. Nos problemanan social principal no ta e causanan di nos decadencia. Ta un refleho! ” Ras a finalisa bisando.