Ademas cu siman pasa caba Minister di Finansa, Asuntonan Economico y Cultura hunto cu Departamento di Asuntonan Economico a introduci un aplicacion special pa asina por yuda e consumidor tene e poder di compra den su man. E siman aki continuando cu e maneho di Minister di Finansa, Asuntonan Economico y Cultura Sra. mr. Xiomara Ruiz-Maduro, Departamento di Asuntonan Economico (DEZHI) hunto cu Departamento di Salubridad Publico (DVG) y Cuerpo Policial Aruba (KPA) un bes mas a sigui cu nan control regular na supermercadonan caminda a controla si e establecimentonan ta cumpli cu comunidad di Aruba cu e.o. ofreciendo e prijs maximo stipula pa productonan di canasta basico, tin e permisonan necesario, cumpli cu higiëna y calidad di producto- y alimento.
Durante e controlnan aki a bin constata cu tin supermercadonan cu no ta cumpli cu e.o. prijs maximo di productonan di canasta basico, hygiëna di e localidad, fechanan di vencemento di productonan y certificado di salud di empleadonan. Esaki tabata tin como consecuencia cu mester a coregi prijs di productonan di canasta basico cu tabata surpasa e prijs maximo stipula, algun supermercado a wordo cera pa motibo di higiëna e.o. falta di certificado di salud, productonnan cu a caduca y asina e establecimentonan aki por regla nan asuntonan pa asina por cumpli cu leynan vigente pa nan por haya permiso pa opera bek.
Nos ministerio y e departamentonan concerni ta bin ta ricibiendo diariamente informacion y keho di comunidad riba localidadnan cu ta bende productonan di canasta basico mas halto cu e prijs maximo, producto of alimento pa consumidor cu no ta cumpli cu leynan stipula. Di su banda Gobierno y e departamentonan ya menciona ta sigui haci nan maximo esfuerso pa atende y investiga tur informacion ricibi y ta encurasha nos comunidad pa sigui ta critico na momento di cumpra un producto y si como consumidor bo tin cualkier duda por yama e departamentonan concerni of presenta cerca nan cu productonan cu por ta dudoso.
Pa mas informacion por tuma contacto cu DEZHI, DVG of KPA.